Policia e Tiranës ka arrestuar 42-vjeçarin Klered Bozhanaj, i cili pasditen e djeshme plagosi me armë zjarri një efektiv policie të forcave “Shqiponja”, Edlir Alleshi.
Mësohet se Bozhanaj është arrestuar pranë banesës së tij në “Kinostudio” dhe se ishte ende i armatosur.
Policia, sekuestroi edhe armën e zjarrit që tentoi të vriste policin i cili pasditen e djeshme ishte në ndjekje të tij.
Njoftimi i policisë:
Policia vë në pranga autorin e plagosjes me armë zjarri të punonjësit të Policisë mbrëmjen e djeshme.
Në vijim të veprimeve kërkimore të kryera nga strukturat e DVP Tiranë, për kapjen e autorit të ngjarjes së ndodhur mbrëmjen e djeshme, shtetasit Klered Bozhanaj, 42 vjeç, i cili ka tentuar të vrasë me armë zjarri punonjësin e Policisë, inspektor E. A., ju informojmë se:
Gjatë kërkimeve intensive të zhvilluara për kapjen e shtetasit Klered Bozhanaj, strukturat e Policisë kanë lokalizuar dhe ndaluar autorin e dyshuar.
Në cilësinë e provës materiale është sekuestruar arma e zjarrit pistoletë, e përdorur gjatë krimit.
