Gjyqtarja e Beratit aksidenton dje rëndë të moshuarin. Lutfije Celami, e emëruar në vitin 2014 në gjykatën e këtij rrethi, bënte çdo ditë rrugën nga vendbanimi i saj në Tiranë drejt Beratit.
Por dje rreth orës 11:00, në aksin rrugor Lushnjë-Berat rreth 500 metra përpara kryqëzimit të fshatit Fier-Shegan, një i moshuar me biçikletë i ka prerë asaj rrugën. Gjyqtarja e ka pasur të pamundur të manovrojë e për pasojë, shtetasi me inicialet H.D., 70 vjeç, ka mbetur i plagosur rëndë.
Gjyqtarja është shoqëruar për disa orë në Komisariatin e Lushnjës ku ajo ka dhënë deklaratën e saj në lidhje me ngjarjen. Sipas të dhënave nga grupi hetimor, ajo ka deklaruar se i moshuari i kishte dalë para në mënyrë të menjëhershme dhe ndonëse ka frenuar në moment, nuk ka mundur dot ta shmangte përplasjen.
Pozita e saj është lehtësuar para oficerëve të policisë, pasi siç mësohet se gjyqtarja nuk është larguar nga vendi i ngjarjes, por është ndaluar duke i dhënë ndihmën e parë të plagosurit. Policia ka mbërritur në një kohë të shpejtë në vend dhe e kanë çuar menjëherë në spital të moshuarin. Pas trajtimit të parë në spitalin e Lushnjës, i plagosuri është nisur për mjekim më të specializuar drejt Tiranës. Bluzat e bardha janë shprehur se ai është jashtë rreziku për jetën.
“Ka marrë plagë të lehta në pjesët e këmbëve dhe është jashtë rreziku për jetën, por për më shumë siguri e nisëm drejt Tiranës, pasi kishte edhe probleme të tjera me shëndetin edhe për shkak të moshës”, u shprehën mjekët e Lushnjës. Paraprakisht, sipas të dhënave të para nga grupi hetimor, aksidenti ka ndodhur si shkak i pakujdesisë së drejtuesit të biçikletës, i cili nuk ka respektuar kalimin në rrugë në korsinë e tij, duke rrezikuar kështu jetën e tij dhe të drejtueses së mjetit tip “Tojota”.
Pasi ka dhënë deklaratën në Polici, gjyqtarja e Beratit mësohet se do të hetohet në gjendje të lirë. “Lutfije Celami po hetohet në gjendje të lirë deri në zbardhjen e rrethanave të ngjarjes. Me hetimet po merret Prokuroria e Lushnjës”, u shpreh në lidhje me këtë ngjarje kreu i Komisariatit të Lushnjës, Eduard Sulejmani.
Mësohet se gjyqtarja Celami është emëruar gjyqtare në Berat në fillim të vitit 2014. Edhe ditën e djeshme, si çdo ditë ajo ka qenë duke udhëtuar për në vendin e saj të punës./Panorama
