Gruaja e 59-vjeçarit shqiptar që plagosi infermieren greke në Athinë një ditë më parë dhe më pas u vetëvra, ka folur mbi arsyet që mund ta kenë çuar të shoqin drejt veprimit drastik.
Teksa foli për shtypin grek, bashkëshortja e shqiptarit u shpreh se i shoqi mendonte se ishte operuar gabim dhe ishte revoltuar me stafin e spitalit.
Ajo sqaroi se burri i saj nuk vuante nga probleme të shëndetit mendor, sikurse dyshoi policia greke, por ditët e fundit mendonte se i ishte nënshtruar padrejtësisht operacionit.
59-vjeçari shqiptar, identiteti i të cilit nuk është bërë i ditur, ishte diagnostikuar me kancer në mushkëri marsin e kaluar dhe më 19 Gusht të këtij viti iu nënshtrua një operacioni.
Por në një gjendje të rënduar, një ditë më parë, shqiptari thërriti për ndihmë infermieren dhe po e priste pas dere. Sapo ajo hyri në dhomë, shqiptari e goditi me thikë dhe me grushte. Më pas u ngjit në katin e pestë të spitalit dhe u hodh duke u vetëvrarë. Infermierja 32-vjeçare ka mbetur e plagosur me dëmtime të rënda, por jashtë rrezikut për jetën./Opinion.al
