Oficeri i Burgjeve që u arrestua për plagosjen e biznesmenit Pëllumb Gjoka mbrë mjen e së hënës, doli dje para Gjykatës së Tiranës për caktimin e masës së sigurisë, shkruan “Panorama”.
Kleant Musabelliu, përmes avokatit të tij, ka deklaruar se ka qëlluar në ajër dhe jo në rreze të drejtpërdrejtë, në mënyrë që të mbronte jetën e djalit të tij.
Ndërsa veprimin e tij e ka justifikuar si mbrojtje pas sulmit agresiv të biznesmenit dhe personave që e shoqëronin, që ai deklaron se e kanë qëlluar me grushte në kokë dhe në trup.
Avokati i 43-vjeçarit, Ilir Murati, i kërkoi gjykatës që veprimi i Kleant Musabelliut nuk duhet të konsiderohet vrasje me dashje e mbetur në tentativë, por vrasje në kapërcim të kushteve të vetëmbrojtjes së nevojshme.
E për këtë arsye, avokati kërkoi që masa e sigurimit personal për klientin e tij të ishte “arrest shtëpie”. Por, pavarësisht pretendimeve të avokatit, gjyqtari i gatshëm Artan Gjermeni vendosi të pranojë kërkesën e Prokurorisë, duke caktuar masën “arrest me burg”, për efektivin e Shërbimit të Kontrollit të Brendshëm të Burgjeve, i cili tashmë është i pezulluar nga kjo detyrë.
DESHMIA
“Nuk do ta bëja kurrë një veprim të tillë, por e kam bërë vetëm për të mbrojtur jetën e djalit tim. Me aq sa mbaj mend, kam qëlluar në ajër, jo në rreze të drejtpërdrejtë, dhe kam qenë në një gjendje shumë të rëndë psikike”.
Kjo është një pjesë e deklaratës së 43-vjeçarit Kleant Musabelliu, i cili u arrestua të hënën nga Policia e Tiranës, pasi tentoi të vriste me armën e shërbimit biznesmenin 46-vjeçar, Pëllumb Gjoka.
I dyshuari ka deklaruar para gjykatës se nuk ka pasur asnjë qëllim paraprak për të plagosur Pëllumb Gjokën dhe se kishte shkuar në takim së bashku me djalin, që të sqaronin një zënkë mes dy fëmijëve të tyre.
“Kam shkuar bashkë me djalin që ta takoja për të sqaruar zënkën që kishin pasur fëmijët tanë. Por që në fillim të bisedës jam përballur me agresivitetin e tij dhe të personave që e shoqëronin. Ata më kanë qëlluar me grushte në kokë dhe me bërryla në shpinë”, është shprehur Musabelliu.
Ndërsa ka deklaruar se është detyruar të qëllojë me armë zjarri në ajër, pasi është ndier i frikësuar për sigurinë e djalit të tij.
