Një masiv shkëmbor është shkëputur nga mali dhe ka rënë mbi një banesë në fshatin Xibër të rrethit të Matit, duke dëmtuar rëndë një 53-vjeçar.
Ngjarja ka ndodhur rreth orës 21:30 dhe me të marrë njoftimin grupi hetimor ka shkuar menjëherë në vendin e ngjarjes, ku kanë konstatuar se në lagjen “Mali i Zi”, fshati Xibër-Murrizë, Mat, nga rreth 100 metra lartësi është shkëputur nga shpata e malit një masiv shkëmbor, duke çarë murin e banesës së shtetasit B.T, rreth 53-vjeç, ku për pasojë ky i fundit ka mbetur i dëmtuar rëndë.
Shtetasi B.T, pas marrjes së ndihmës së parë në spitalin e Burrelit është nisur drejt spitalit të Traumës, Tiranës për ndihmë më të specializuar.
Në banesë ndodhej e gjithë familja dhe nuk ka të dëmtuar të tjerë përveç shtetasit B.T.
Grupi hetimor ndodhet në vendin e ngjarjes ku vijojnë hetimet për zbardhjen e kësaj ngjarje.
