Drejtori i ALUIZNI-t në Durrës, Flamur Gjuzi ka mbetur i plagosur disa ditë më parë, por ngjarja është mbajtur sekret. Kështu deklaron Partia Demokratike, e cila akuzon policinë për fshehjen e ngjarjes. Më tej, PD-ja deklaron se ngjarja ka ndodhur në bar kafe Cafetino dhe personi që e ka qëlluar është me iniciale G.XH.
“Ngjarja që ka ndodhur për pazare legalizimesh, është mbajtur e fshehur nga policia, dhe ka pasur tentativë për ta trajtuar sikur është qëlluar në ajër, ndërkohë që drejtori i ALUIZNI është plagosur në këmbë. Për të fshehur ngjarjen është kujdesur Drejtori i Policisë së Durrësit”, deklaron PD-ja.
“Kjo është një provë tjetër që tregon se drejtuesit e Ramës nuk janë aty për të zbatuar ligjin, po për të mbyllur hesapet. Partia Demokratike kërkon të bëhet menjëherë transparencë për rrethanat dhe motivet. Cdo fshehje e mëtejshme e ngjarjes është një krim edhe më e i rëndë që bëhet me dijeninë e bekimin e Edi Ramës”, thuhet në deklatarën e PD-së.
Tre orë pas deklaratës së PD-së ka reaguar Policia e Durrësit, e cila thotë se nuk ka asnjë denoncim apo kallëzim mbi plagosjen e Flamur Gjuzit.
“Lidhur me deklaratën e subjektit politik Partia Demokratike që thotë se Drejtori i Drejtori ALUIZNIT Durrës, shtetasi F.Gj. është plagosur dhe Policia e Durrësit e ka fshehur ngjarjen, sqarojmë se: Policia e Durrësit nuk disponon asnjë denoncim apo kallëzim mbi plagosjen e shtetasit F.Gj. Menjëherë u mor kontakt me këtë shtetas dhe ai mohon kategorikisht faktin se është plagosur apo të ketë patur konflikt. Ftojmë PD të bëj kallëzim pranë organeve përkatëse në rast se disponon të dhëna për shkelje të ligjit ose ngjarje kriminale”, shprehet policia përmes komunikatës për mediat.
/Opinion.al
