Një 20-vjeçar nga Kavaja është arrestuar nga policia për plagosjen me thike të një 19 vjeçari mesditën e së dielës në Durrës.
Policia njofton se për këtë ngjarje është proceduar në gjendje të lirë një 34 vjeçar. Sipas policisë këta dy persona në bashkëpunim me njëri tjetrin kanë goditur me thikë 19-vjeçarin K.Q dhe me sende të forta një 16 vjeçar.
Njoftimi i policisë
Specialistët për Hetimin e Krimit në Komisariatin e Policisë Durrës, pas një pune hetimore dhe profesionale, bënë të mundur identifikimin e autorit të plagosjes së 19-vjeçarit.
Si rezultat i reagimit në kohë dhe bashkëpunimit me qytetarët, Specialistët për Hetimin e Krimeve lokalizuan, kapën dhe arrestuan në flagrancë shtetasin:
J. M., 20 vjeç, banues në Kavajë.
Si dhe u procedua në gjendje të lirë shtetasi A. T., 34 vjeç, banues në Durrës.
Këta shtetas gjatë një konflikti për motive të dobëta, në bashkëpunim me njëri-tjetrin, në lagjen nr. 17 Durrës, kanë goditur me mjet prerës (thikë) shtetasin K. Q., si dhe kanë goditur me sende të forta shtetasin D. M., 16 vjeç, banues në Durrës.
Materialet i kaluan Prokurorisë së Rrethit Gjyqësor Durrës, për veprat penale “Vrasja me dashje” e mbetur në tentativë, e kryer në bashkëpunim dhe “Plagosja e lehtë me dashje”. /Opinion.al
