Një 22-vjeçar, është arrestuar nga Policia e Fierit pasi ishte shpallur në kërkim ndërkombëtar, për llogari të autoriteteve spanjolle. Bëhet fjalë për Xhovalin Aliaj i akuzuar, si pjesëtar i një organizate të dhunshme kriminale.
Bazuar në informacionet e siguruara përmes inteligjencës informative, për vendndodhjen e 22-vjeçarit është finalizuar operacioni policor i koduar “Member”, në kuadër të të cilit ka rënë në pranga i riu.
Autoritetet gjyqësore spanjolle i kanë caktuar Xhovalin Aliajt masën e sigurisë “Arrest në burg”, për veprat penale: “Trafikimi i narkotikëve”, “Mashtrime tregtare”, “Vandalizmi”, “Armëmbajtja pa leje” dhe “Vjedhja e energjisë elektrike”, të kryera në formën e organizatës kriminale dhe të parashikuara nga legjislacioni penal i Spanjës.
Nga hetimet e kryera në këtë shtet, ka rezultuar se 22-vjeçari, në bashkëpunim me shtetas të tjerë, përshtatnin ambiente të mbyllura, në qytete të ndryshme të Spanjës, për kultivim të bimëve narkotike, me anë të llambave.
Interpol Tirana vijon procedurat për ekstradimin e këtij shtetasi.
