Një 34-vjeçar, i cili ishte shpallur në kërkim si pjesëtar i një grupi kriminal, është vënë në pranga nga policia.
Uniformat blu bëjnë me dije se në kuadër të operacionit policor të koduar “Pjesëtari”, pas një hetimi 17-mujor me metoda speciale hetimi, është vënë në pranga D. Sh., 34 vjeç, banues në fshatin Shahinë, Durrës.
“34 vjeçari, i dënuar më parë për armëmbajtje pa leje dhe për vjedhje, ishte i shpallur në kërkim, në kuadër të procedimit penal të nisur në shtator të vitit 2021, për një sërë veprash penale në fushën e narkotikëve, armëmbajtjes pa leje dhe sigurimit të kushteve dhe mjeteve për të kryer vrasje”-njofton policia.
Autoritetet bëjnë me dije se nga hetimet e kryera gjatë këtij procedimi, u siguruan prova se i riu ishte pjesëtar i një grupi kriminal në Durrës dhe se ushtronte veprimtarinë kriminale të shpërndarjes së drogave të forta, kryesisht të lëndës narkotike heroinë.
Në një nga episodet, konkretisht më datë 04.04.2022, është arrestuar në Vlorë, shtetasi P. H., dhe ka rezultuar se lëndën narkotike të llojit heroinë që iu gjet këtij shtetasi, ia ka shitur shtetasi D. Sh.
“Në drejtimin e Prokurorisë pranë Gjykatës së Rrethit Gjyqësor Durrës, vijon puna për dokumentimin e plotë ligjor të veprimtarisë kriminale të kryer nga ky shtetas, kryesisht të shpërndarjes së drogave të forta, të veprimeve të kryera për llogari të grupit kriminal, për sigurimin e kushteve dhe mjeteve për të kryer vrasje, si dhe për armëmbajtje pa leje”-njofton policia./Opinion.al
