Policia ka arrestuar 3 persona në pikën kufitare të Morinës, pasi u kapën në flagrancë teksa transportonin me autobus pjesë automjetesh kontrabandë nga Kosova.
Sipas uniformave blu në pranga ka rënë edhe një doganier, ndërsa po hetohen 3 punonjës policie, pasi dyshohet se janë të implikuar.
“Sektori për Hetimin e Krimeve i DVP Kukës, në bashkëpunim me Drejtorinë Rajonale të Agjencisë së Mbikëqyrjes Policore Kukës- Dibër, Sektori i Hetimit, finalizoi operacionin policor të koduar “Linja”, pas një hetimi me metoda proaktive, të kryer në drejtimin e Prokurorisë së Kukësit. U kapën në flagrancë teksa transportonin me autobus, pjesë automjetesh, me vlerë rreth 8000 euro, të kontrabanduara nga Kosova, arrestohen 3 shtetas. Gjithashtu, vihen në pranga 1 doganier i Degës Doganore Morinë dhe në hetim 3 punonjës policie të PKK Morinë, të dyshuar të implikuar në këtë rast. Sekuestrohen mallrat (disqe automjetesh) e dyshuara të kontrabanduara. Si rezultat i një hetimi të ndjekur proaktivisht, për goditjen e rasteve të transportimit të mallrave të ndryshme, nga Kosova, me qëllim shitjen në Shqipëri, u finalizua operacioni policor i koduar “Linja”, në kuadër të të cilit: -u vunë në pranga shtetasit:
Sh. H., 53 vjeç, G. B., 37 vjeç dhe I. H., 35 vjeç, për veprën penale “Kontrabanda me mallra të tjera”, kryer në bashkëpunim. Xh. Sh., 46 vjeç, me detyrë doganier në Degën Doganore Morinë, për veprën penale “Kontrabanda nga punonjës që lidhen me veprimtarinë doganore”. -u referuan materialet në Prokurori, ku nisi procedimi në gjendje të lirë për shtetasit E. D., 28 vjeç, H. K., 54 vjeç dhe B. Gj., 50 vjeç, punonjës policie, me detyrë kontrollorë në PKK Morinë, për veprën penale “Shpërdorimi i detyrës”. Shtetasit Sh. H., G. B. dhe I. H. u kapën në flagrancë teksa transportonin me një autobus që e drejtonte 53-vjeçari, disqe automjetesh, me vlerë rreth 8000 euro, të dyshuara të kontrabanduara nga Kosova, me qëllim shitjen në Shqipëri. Në vijim, nga hetimet dyshohet se shtetasi Xh. Sh. ka bashkëpunuar me 3 të arrestuarit, për kryerjen e kësaj veprimtarie kriminale, si dhe se 3 të proceduarit duke shpërdoruar detyrat, kanë lejuar kryerjen e kësaj veprimtarie”, njofton policia.
