Nënkomisari Emiljano Nuhu, të mërkurën, ka treguar në pjesën e dytë të rrëfimit se deputeti i PS-së, Rrahman Rrahja ka pajtuar Durimin Bamin për t’a ekzekutur. Sipas tij, për një fakt të tillë ka vënë në dijeni edhe strukturat më të larta të shtetit.
Nuhu rrëfei për gazetarin Basir Çollaku në lidhje me hetimin e zhvilluar nga ai, për përdhunimin e Xhensila Malokut nga djali i deputetit të PS-së, Rrahman Rrahja.
“Kam marrë informacion nga rrjeti im sekret, që deputeti Rrahman Rrahja, ka kontaktuar me shtetasin Durim Bami dhe i ka kërkuar të më ekzekutojë, pasi unë po i hapja shumë probleme dhe po e dëmtoja politikisht deputetin. Ai është shprehur se me kaq probleme që më ka hapur Emiljano Nuhu unë nuk shkoj dot në Parlament“, -citohet nga intevista e nënkomisarit Nuhu.
Nënkomisari Emiljano Nuhu, më herët, tregoi se kreu i grupit parlamentar të PS-së deputeti Taulant Balla ka ardhur dhe e ka liruar nga Komisariati i Fushë Krujës djalin e deputetit, ndaj të cilit ishte prerë fletë arresti.
Nuhu ka treguar gjithashtu edhe se vëllai i deputetit i ka vënë pistoletën në kokë, ndërsa deputeti Taulant Balla i ka thënë me ironi: Hiqe pistoletën nga koka se oficeri është djalë i mirë dhe gjithçka që ka ndodhur do të mbesë këtu.
Nuhu ka treguar se kur ka mbërritur në komisariatin Nr.6 për të kallëzuar personat që e kanë kërcënuar me armë, kallëzimi i tij nuk është marrë parasysh.
Madje shefi i komisariatit i ka komunikuar se ka negociuar me personat në fjalë dhe nuk do e vrasin.
Nënkomisari tregoi se më pas i ka dërguar letër drejtorit të Përgjithshëm të Policisë së Shtetit dhe ministrit të Brendshëm, por ai nuk është marrë parasysh.
Nuhu tregoi se i kam dërguar edhe një letër drejtorit të Përgjithshëm të Policisë për transferimin pranë familjes, pasi të arrija ta mbroja vetë atë.
