Në kuadër të operacionit policor të koduar “Flagranca” është vënë në pranga 26-vjeçari me iniciale P.B. dhe 37-vjeçari me iniciale G.B.(S)., të dy banues në Tiranë.
Policia njofton se në “Zog të Zi” është ndalur automjeti tip “Honda” me drejtues 37-vjeçarin dhe me pasagjer 26-vjeçarin. Gjatë kontrollit fizik, uniformat blu i gjetën këtij të fundit një pistoletë me krehër dhe fishekë që dyshohet se e posedonte me qëllim shitjen e armës në Tiranë.
Në momentin e ndalimit të automjetit shoferi që dyshohet se do ta ndihmonte 26-vjeçarin për të shitur armën, ka kundërshtuar me dhunë punonjësit e Policisë dhe ka tentuar që të largohet. Nga verifikimet e mëtejshme rezultoi se 26-vjeçari P. B. ishte me masë sigurie “Arrest në shtëpi”, për veprën penale “Vjedhja”.
Vijojnë hetimet për dokumentimin e këtij rasti dhe për identifikimin e shtetasve të tjerë të dyshuar të përfshirë. Materialet procedurale i kaluan Prokurorisë, për veprime të mëtejshme.
