E ndërtuar në vitet ’86-’88 si Muze i Enver Hoxhës, Piramida ka qenë gjithnjë mollë sherri e politikës e për pasojë ka mbetur prej vitesh një gërmadhë, sidomos pas largimit të TCH nga kjo godinë. E djathta e Sali Berishës kishte projektuar shembjen e saj dhe ndërtimin e kompleksit parlamentar. Projekti i djathtë mbeti në letër.
Me ardhjen e së majtës në pushtet, ndryshon edhe këndvështrimi për Piramidën. Ajo nuk do të shembet siç pritet të ndodhë me Teatrin Kombëtar. Sot, Kryetari i Bashkisë së Tiranës Erion Veliaj ka nënshkruar një marrëveshje me Fondacionin Shqiptaro-Amerikan të Zhvillimit (AADF) për restaurimin e kësaj godine. “Piramida do të kthehet në qendrën më të madhe multifunksionale për të rinjtë, e fokusuar kryesisht në arsimimin digjital, por dhe të artit e kulturës”, thuhet në njoftim për media të bashkisë së kryeqytetit.
Po sipas Bashkisë, Piramida do të shërbejë si një lloj inkubatori për bizneset në fushën e inovacionit, artit dhe kulturës. Pra të rinjtë që pritet ta frekuentojnë do të kenë mundësi të ndjekin kurse të ndryshme në fushën e IT dhe të komunikacionit, sikurse është dizajni, programimi etj.
Veliaj tha se “vendosja e kësaj ndërtese në shërbim të të rinjve të Tiranës do të ketë një efekt transformues për qytetin tonë. Për këtë projekt janë bashkuar më të mirët e pushtetit vendor, me më të mirët nga bota e filantropisë edhe projekteve të guximshme, si AADF”, tha ai, duke shtuar “se do ta bëjmë kartolinë të bukur të Tiranës”.
Ndërsa, bashkëdrejtuesi i AADF, Martin Mata tha më shumë detaje. “Jemi duke kërkuar shumë për të gjetur modele në fushën e arsimit, të qëndrueshme dhe moderne, të cilat bota i ka provuar. Një ndër këto është projekti “TUMO”, të cilët kanë pranuar të vijnë ta menaxhojnë në vitet e para, padiskutim nën kujdesin tonë të përbashkët, financimin tonë të përbashkët”.
Bashkia e Tiranës thotë se është duke biseduar me disa nga studiot më të mira të arkitektëve dhe brenda Majit do të bëhet edhe prezantimi publik i asaj që do të ndodhë me Piramidën. Nuk ka ende asnjë informacion zyrtar mbi faturën financiare të rikonstruksionit të kësaj godine.
/Opinion.al
