“Quhem Artan Lazaj. Aktualisht jam me funksion gjyqtar pranë Gjykatës së Rrethit Gjyqësor Tiranë”. Gjykatësi Artan Lazaj, njëherazi kandidat për Këshillin e Lartë Gjyqësor, vë me shpatulla pas murit Komisionin e Pavarur të Kualifikimit.
Ai ishte ftuar për të dhënë shpjegimet e tij në seancë dëgjimore publike, por ndryshe nga sa pritej, gjykatësi i karrierës, e detyroi trupën gjykuese të shtyjë procesin, pas kërkesës që bëri për përjashtim e saj.
Debati procedural mes palëve nisi menjëherë, pasi kryesuesja e seancës Brunilda Bekteshi deklaroi se hetimi për gjykatësin, kishte përfunduar vetëm për një nga tre komponentët, atë të pasurisë.
“Kjo trupë gjykuese ka vendosur të përfundojë procesin e rivlerësimit bazuar vetëm në një kriter, atë të pasurisë duke mos vendosur në këtë mënyrë mbi kriterin e figurës dhe atë profesional”, deklaroi Brunilda Bekteshi.
Kaq mjaftoi që avokati Sokol Hazizaj t’i kërkonte trupës të tërhiqej dhe ta thërriste të mbrojturin prej tij në seancë, pasi të kishte përfunduar hetimin në të tria kriteret; atë të pasurisë, figurën morale dhe atë të aftësisë profesionale.
“Neni Q i Kushtetutës e parashikon vlerësimin tredimensional të subjektit të rivlerësimit, që është integriteti, pasuria dhe profesionalizmi dhe pastaj është e drejta e Komisionit të Pavarur të Kualifikimit të marrë vendim, qoftë edhe bazuar në një. E drejta për një proces të rregullt ligjor është e drejta e parashikuar jo vetëm nga Kushtetuta e Republikës së Shqipërisë por është e parashikuar dhe nga Konventat europiane”, deklaroi Hazizaj.
E gjendur për herë të parë, përballë një kërkese të tillë, trupa u tërhoq në dhomën e këshillimit.
15 minuta më pas shpallën verdiktin e ndërmjetëm, duke e konsideruar ta pabazuar pretendimin e avokatit Hazizaj.
Ky i fundit, nuk u ndal. I gjendur në krahun e djathtë të Artan Lazaj, i cili miratoi gjithçka në heshtje, avokati kërkoi përjashtimin e trupës gjykuese, të cilën e akuzoi për njëanshmëri në vendimmarrje.
Trupa, duket se nuk pati asnjë zgjidhje tjetër. Për të dytën herë u ngujua në dhomën e këshillimit. 30 minuta më pas, kryesuesja deklaroi shtyrjen e procesit për në datën 2 korrik, derisa një trupë tjetër të vendosë për kërkesën e avokatit.
Kjo është hera e parë, që një subjekt rivlerësimi ngre pretendimin se Komisioni duhet ta përfundojë hetimin në të tria shtyllat e procesit, përpara se të thërrasë gjykatësin apo prokurorin në seancë dëgjimore publike.
Artan Lazaj, e ngriti siparin dhe hapi precedentin, që me gjasë do të ndiqet edhe nga kolegë të tjerë të tij.
Më herët, Komisioni ka vendosur për shkarkimin e gjykatësve apo prokurorëve, duke u mjaftuar me përmbylljen e hetimeve vetëm në kriterin e pasurisë. I tillë është rasti i ish-gjykatësit të Kushtetueses, Fatmir Hoxha.
