Italiani Guido Andra Guidi nuk do të dalë para gjykatës, pasi për shkak të marrëveshjes me prokurorinë ai do të hetohet në gjendje të lirë dhe i ruajtur 24 orë nga zyra për mbrojtjen e bashkpëunëtorëve të drejtësisë.
Prokuroia kërkon ndihmë nga Interforca italiane, që ka zbardhur emrat e personave që e kanë kontraktuar italianin për të kryer trafik droge me avion.
Piloti Italian Guido Andrea Guidi nuk do të dalë para Gjykatës së Krimeve të Rënda për masë sigurie, raporton Abc News.
Prokuroria nuk do të nxjerr para gjykatës pilotin 69 vjeçar pasi ka vendosur hetimin e tij në gjendje të lirë. Sipas prokurorisë, për shkak të marrveshjes me prokurorët e çështjes për të rrëfyer linjën e trafikut të drogës me avion dhe personat që e kanë kontraktuar, moshës dhe veprën penale për të cilën akuzohet “shkelje së rregullave mbi fluturimet” që parashikon një dënim nga gjobë deri 5 vjet burg, është vendosur që italiani mos t’i caktohet masë sigurie pasi i është bllokuar pasaporta. Veç këtyre, sipas akuzës, piloti Italian është marrë në ruajtje fizike nga Zyra për Mbrojtjen e Bashkpëunëtorëve të Drejtësisë që ndodhet pranë Ministrisë së Brendshme.
Komisoni i posaçëm i ngritur pranë kësaj zyre, ka vendosur të pranojë kërkesën e prokurorisë që të merret në mbrojtje piloti italian me cilësinë e bashkëpunëtorit. Mësohet se italiani prej ditësh po mbahet në një vend sekret në kryeqytet, i ruajtur 24 orë nga forca policie. Burimet thonë se nuk është finaluzuar ende marrëveshja përfundimtare mes italianit dhe prokurorisë, pasi po verifikohen deklarimet për të parë nëse thotë të vërtetën. Për këtë fakt, sipas akuzës, është kërkuar ndihmë nga zyra e Interforcës italiane në Tiranë për të verifikuar emrat e personave që piloti pretendon se kanë pajtuar për të kryer transportin e drogës.
Paraprakisht, mësohet se prokurorisë i është konfirmuar se personat, emrat e të cilëve i ka dhënë piloti italian, janë me precedente kriminalë në fushën e trafikut të drogës dhe armëve. Pas këtyre të dhënave, mësohet se edhe prokuroria e Barit dhe ajo e Milanos kanë nisur hetimet konkrete për shtetasit italian e shqiptar të përfshirë në rrjetin e trafikut të drogës. Burimet thonë se piloti italian ka treguar për takimet në Milano me shtetas italian e shqiptar të dënuar për trafik droge si dhe për personat me të cilët është takuar në Shqipëri, në dy rastet e udhëtimit të tij para rrëzimit të avionit.
Nga ana tjetër, mediat italiane kanë publikuar të dhëna të prokurorisë së Barit, e cila prej muajsh po heton grupe kriminale që kryejnë trafik të lndëve narkotike nga Shqipëria me avion.
