TIRANË- Kryeministri Edi Rama ka kërkuar ndjesë për dekorimin e Shyqyri Çokut, pikërisht në vendin ku ish-hetuesi ka persekutuar klerikun At Zef Pllumi dhe studiuesin Sami Repishti. Po kështu deputetë të mazhorancës kanë deklaruar se këto dekorata do të tërhiqen.
Kur dhe si? Janë pyetjet që lindin….
Opinion.al u interesua në Ministrinë e Mbrojtjes, aty ku u mblodh një vit më parë grupi ndërministral, dhe u vendos për 1 000 personat që do të dekoroheshin me rastin e 70 vjetorit të Çlirimit. Ne pyetën se çfarë do të ndryshojë? Do të detyrohen veteranët të kthejnë mbrapsht këto medalje dhe paratë e shpërblimit?
Përgjigjia ishte mjaft evazive. “Kemi filluar punën dhe kemi çuar në Kryeministri propozimin për ndryshimin e VKM-se dhe ligjit të vitit 1994 me qëllim pastrimin e listave nga kjo kategori”.
Të njëjtën gjë tha dje ministrja e Mbrojtjes Mimi Kodheli në Parlament, fjala e së cilës u ndërpre nga deputetët e djathtë.
Pra, sipas Ministrisë së Mbrojtjes do të ndryshohet ligji dhe deri në ndryshimin e tij Shyqyri Çoku dhe të tjerë do ti gëzojnë këto medalje.
Me sa duket kjo çështje do të vazhdojë të debatohet, pasi askush nuk është i qartë se çfarë do të bëhet konkretisht. Eshte thjesht një premtim i Kryeministrit që pritet për t’u parë se sa do të mbahet.
