Vdekja e papritur në moshë të re e kapitenit të Fiorentinës Davide Astori ka prekur shumë njerëz nga bota e futbollit, miq të lojtarit. Një ndër ta është edhe mbrojtësi serb i Chievos, Nenad Tomoviç, që ka luajtur për dy sezone me Astorin te Fiorentina.
“Davide, miku im…
Ka shumë pak gjëra për të thënë.
Ke qenë një person special.
Ka qenë kënaqësi të luaja krah teje dhe të isha miku jot.
Davide, ishe një nga personat më inteligjentë që kemi parë.
Dua të them se do shihemi sërish dhe do të marrim nga një gotë verë së bashku.
Do të më pëlqente vërtetë që ti të më prisje, kur të vijë momenti im.
Mbi të gjitha ti”, shkruan ai.
Kapiteni i Fiorentinës, Davide Astori, vdiq sot si pasojë e një infarkti kardiak.
“Fiorentina është thellësisht e shokuar të njoftojë se kapiteni Davide Astori ka vdekur. Për këtë situatë të rëndë dhe delikate, dhe mbi të gjitha për respektin për familjen e tij, apelojmë për sensitivitet nga media”, thuhet në një njoftim të klubit.
Astori nisi karrierën në Milan, ku s’luajti asnjëherë në Serie A, para se të kalonte te Caglari, ku u paraqit në 174 ndeshje. Më 2014 ai kaloi te Roma dhe më pas te Fiorentina.
