Presidenti i Kosovës, Hashim Thaçi, ka thënë se do ta respektojë vendimin e së premtes të Gjykatës Kushtetuese, e cila ka pezulluar deri më 29 maj, dekretin e tij që i mundësonte kandidatit të Lidhjes Demokratike të Kosovës, Avdullah Hotit, të formonte Qeverinë e re të Kosovës.
“Kosova ka tashmë një përvojë të çmueshme në respektimin e të gjitha vendimeve dhe aktgjykimeve të Gjykatës Kushtetuese. Kjo përvojë është një dëshmi e fuqishme e sundimit të ligjit në Republikën e Kosovës”, ka thënë Thaçi përmes një postimi në rrjetin social, Facebook.
Ai po ashtu u ka bërë thirrje të gjitha politikanëve dhe subjekteve politike që të sillen me maturi në përputhje me Kushtetutën e Kosovës.
Më 30 prill, Thaçi njoftoi se kishte dekretuar kandidatin e Lidhjes Demokratike të Kosovës, Avdullah Hotin, për postin e kryeministrit të Kosovës.
Po ashtu, Lidhja Demokratike e Kosovës ka thënë se do ta respektojë në tërësi vendimin e Gjykatës Kushtetuese, e cila rrëzoi kandidatin e kësaj partie, Avdullah Hotin për postin e kryeministrit
“LDK-ja, me anë të marrëveshjeve politike, ka arritur të sigurojë shumicën e nevojshme për formimin e Qeverisë së re”, është thënë në një komunikatë për media të kësaj partie./ Opinion.al
