Ministrja Arsimit, Sportit dhe Rinisë ka pezulluar rektorin e Universitetit të Tiranës. Në një deklaratë për mediat, ministrja Besa Shahini tha se tani i takon presidentit të Republikës të shkarkojnë rektorin Mynyr Koni.
“Më vjen keq për zotin Koni, unë jam udhëheqëse dhe dua të sigurohem që reforma po zbatohet. Është e vështirë që të marrësh vendim për të pezulluar dikë që është zgjedhur me vota. Vendimin për të shkarkuar rektorin e merr Presidenti dhe ai do ketë në dispozicion çdo informacion. Jam dakord me Presidentin ku në Universitetin e Tiranës, nuk është zbatuar ligji dhe është keqmenaxhuar. Jam e bindur që Presidenti do të marrë vendimin e duhur për të zgjidhur ngërçin në Universitetin e Tiranës”, deklaroi ministrja Shahini.
Sipas Ilir Metës, reforma në arsimin e lartë ka dështuar të sigurojë autonominë dhe pavarësinë financiare të universiteteve. Meta një ditë më parë ka thënë se reforma dhe kërkimi shkencor duhet të ketë një frymë më gjithëpërfshirëse, ndërsa e cilësoi të pajustifikueshme mungesën e kartës së studentit.
“Protestat e drejta të studentëve gjatë dhjetorit të kaluar treguan se zbatimi i ligjit aktual të Arsimit të Lartë ka probleme. Zbatimi i Ligjit të Arsimit të Lartë ka pasur vështirësi për të siguruar autonominë dhe pavarësinë financiare të universiteteve publike. Reforma të synojë që universitetet të jenë të pavarur dhe të pakushtëzuar nga politika”, është shprehur presidenti Meta./Opinion.al
