Parlamenti Evropian votoi me 370 vota në favor, 109 kundër, dhe me 143 abstenime, për një ngrirje zyrtare të procesit të anëtarësimit të Turqisë në BE.
Kësisoj Bashkimi Evropian do të pezullojë zyrtarisht negociatat e Turqisë për t’u bashkuar me bllokun, bënë me dije ligjvënësit e BE, teksa kritikuan presidentin turk, Erdogan për abuzime me të drejtat e njeriut.
“Dikush rri i ulur në një qeli për 17 muaj, pa ditur se për çfarë po akuzohet, ky është realitet në Turqinë e sotme”, tha Kati Piri, nga e majta holandeze. Ajo akuzoi Erdoganin për “luftë kundër kritikëve të tij”, duke iu referuar asaj që BE thotë se është një goditje ndaj disidentëve, rënies së një gjyqësori të pavarur dhe një kthese drejt autoritarizmit, sjellje këto që nuk përputhen me vlerat e bllokut, si demokracia dhe liria e fjalës.
Ankaraja hodhi poshtë votimin duke e quajtur si të pavlefshëm, të papranueshëm dhe të padenjë. Ministria e jashtme turke shtoi se priste që PE të marrë vendime objektive dhe të përshtatë një qëndrim konstruktiv për të kontribuar në procesin e pranimit të Turqisë në BE.
Ky vendim u miratua dy ditë përpara se shefja e politikës së jashtme të BE, Federica Mogherini të takohet me ministrin e jashtëm turk, Mevlut Çavusoglu, në Bruksel për të diskutuar marrëdhëniet dypalëshe./Opinion.al
