Përfaqësuesi i Partisë Socialiste Alfred Peza tha në emisionin “Opinion” se pala shqiptare I ka propozuar Greqisë që në vitin 2017 zgjidhjen e çështjes së detit në Gjykatën Ndërkombëtare.
Peza tha se në atë kohë Greqia e kishte refuzuar këtë zgjidhje, për të cilën është rënë dakord vetëm sot.
“Pas vendimit të Gjykatës Kushtetuese që u mor në vitin 2009, negociatat rifilluan sërish, por u ndërprenë për shkak të ndryshimit të qeverisë në Greqi. Pala shqiptare ka kërkuar në 2017 që të shkojë në Hagë, por pala greke nuk e ka pranuar. Një nga propozimet që pala shqiptare ka bërë kur nuk po bihej dakord ishte Gjykata e Hagës dhe pala greke nuk e ka pranuar. Dihet si shkoi dinamika në Athinë dhe çështja rifilloi sërish”, tha Peza.
Sipas analizës që bëri, Peza tha se Greqia pranoi sot propozimin e 2017 edhe për faktin se tashmë është vendosur përballë një situate të tensionuar edhe me Turqinë./Opinion.al
