Numri dy i Lëvizjes Socialiste për Integrim, Petrit Vasili ka kritikuar qëndrimin e mbajtur të ambasadorit të BE-së në Tiranë, Luigi Soreca, në lidhje me kushtet gjermane për negociatat.
Një ditë më parë, Soreca tha se kushtet e vëna nga Bundestagu për vendimin zyrtar për çeljen e negociatave me Shqipërinë, janë vetëm dy. Të tjerat, për ambasadorin e BE-së në Tiranë janë “elementë”.
“Bundestagu gjerman thjesht njohu ecurinë e mjaftueshme që kishte bërë Shqipëria, duke identifikuar po ashtu disa fusha që ishin identifikuar më parë në Shqipëri, kështu që nuk do flas për kushte të reja. Gjermania është një vend i rëndësishëm në be për rolin që luan jo vetme brenda be por edhe në arenën ndërkombëtare në politikën e jashtme. Kemi gjithë shtetet e tjera anëtare të BE që po vijojnë diskutimet e tyre në lidhje me vendimin që do të merret në tetor. Është një hap që na çon në rrugën e duhur por le të respektojmë edhe diskutimet që po vijojnë shtetet e tjera. Është e rëndësishme në rezolutën, Bundestagu i ka dhënë mandatin qeverisë t’i thotë “PO” Shqipërisë për çeljen e negociatave, nëse edhe shtetet e tjera do të ndajnë këtë qëndrim në Këshill, këshilli do të marrë këtë vendim të rëndësishëm. Nëse merret është një vendim i këshillit të BE-së por do të pasohet nga një konferencë ndërqeveritare ku BE dhe Shqipëria do të ulen së bashku për çeljen zyrtare të negociatave. Është kërkuar nga Bundestagu, që në periudhën mes vendimit të këshillit të BE-së dhe konferencës që mund të zgjasë 3-6 muaj, të bëhen 2 gjëra. Çelja zyrtare e negociatave do të ndodhë në këtë konferencë ndërqeveritare. Ndërkohë kemi dhe disa elementë të tjerë që i gjejmë në rezolutën e Bundestagut, natyrisht janë elementë që janë quajtur kushte të përgjithshme, që janë elementë që duhen përmbushur pikërisht përpara hapjes së kapitujve të caktuar gjatë negociatave”, deklaroi Soreca.
Por për Petrit Vasilin, ambasadori ngatërroi çuditërisht kushtet me elemente.
“Kushtet gjermane janë dhe mbeten të tilla dhe këtë nuk e luan topi. Qe Shqipëria ka bere regres të rëndë e të rrezikshëm pas vitit 2017 e këndej dhe kushtet vetëm janë shtuar edhe këtë nuk e luan topi. Që Shqipëria mbeti në mënyre të turpshme pas Maqedonisë se Veriut as këtë nuk e luan topi. Që Shqipëria është në krize të rende politike,qe Shqipëria nga faktor stabiliteti në rajon është shndërruar ne gjeneruese tensioni,qe Shqipëria e Edi Rames bën votime moniste ku rilindja fiton 100% janë fakte qe nuk i luan topi”, shkruan Petrit Vasili.
Po ai shkon edhe më tej teksa akuzon ndërkombëtaret se kanë mbyllur sytë përpara këtij realiteti./ Opinion.al
