LIBRA, organizata politike e deputetëve Ben Blushi dhe Mimoza Hafizi ka nisur një peticion kundër tarifave të larta studentore. Ky peticion ka 4 ditë që ka nisur dhe janë mbledhur rreth 1500 firma.
Të rinjtë e LIBRA-s kërkojnë që qeveria shqiptare, përmes një financimi dinjitoz për Arsimit të Lartë,të ulë ndjeshëm tarifat e shkollimit në Universitetet Publike.
Sipas tyre, “është e pajustifikuar rritja e këtyre tarifave edhe për faktin se universitetet publike nuk kanë patur ndonjë rritje domethënëse të shpenzimeve vjetore gjatë viteve të fundit për infrastrukturë apo shpenzime të tjera të përgjithshme. Kjo rritje penalizon familjet dhe studentët e varfër dhe ata të shtresës së mesme.
Rrogat e shumicës së popullsisë nuk kanë pësuar rritje, në ndryshim me taksat, akcizat për disa produkte dhe çmimet në treg. Pra, varfëria e shumë familjeve i kufizon të rinjve mundësinë e studimit dhe kjo është e padrejtë.”
