Rei Manaj nuk e ka të garantuar vendin në formacionin titullar të Peskarës, edhe pse ky klub kërkoi me ngulm huazimin e tij nga radhët e Interit. Sulmuesi shqiptar, për momentin është i projektuar si një titullar nga trajneri Masimo Odo, i cili ka shprehur hapur besimin që ka për cilësitë e futbollistit. Por konkurrenca nuk do t’i mungojë.
Vetë Odo ka lënë të kuptohet në një intervistë të dhënë për “La Gazzetta Dello Sport” se pavarësisht këtij besimi, Peskara është në kërkim të sulmuesve të tjerë. “Kush do të jetë pasardhësi i Lapadula? Për momentin në përbërje kemi Manajn. Do të vijnë dy sulmues të tjerë, por mos më kërkoni emrat e tyre”, ishin fjalët e trajnerit.
Në mediat italiane flitet prej shumë ditësh për afrimin e sulmuesve Osvaldo dhe Makeda. Nëse i pari vështirë se mund të mbërrijë te një klub me buxhet financiar relativisht të kufizuar si Peskara, i dyti është gati të luajë shanset e tij për të ringjallur një karrierë që mendohej se do të ishte shumë premtuese por që e ka kthyer në një udhëtues në kategorinë e dytë angleze.
