“Deri në janar do shihni arrestime të peshqve të mëdhenj!” Kjo shprehje e ambasadorit amerikan Donald Lu, 6 muaj më parë, tani është kthyer në legjende dhe përmendet nga i madh e vogël në vend përfshirë dhe ministrin e Brendshëm. Ky i fundit ishte sot në Korçë në një forum me qyteratët për sigurinë publike. Në fillim Xhafaj, komplimentoi korçarët duke iu thënë se ju jeni njerëz të shëtitur dhe dini rë respektoni policët më pas shpjegoi edhe pse nuk janë kapur ende peshqit e mëdhenj.
“Besimi tek polici është i rëndësishëm, se është besimi te shteti. Po a është vetingu një proces që e dëmton policinë? Jo, unë nuk besoj. Besoj fort që e ndihmon Policinë. Pjesa tjetër që është folur për një ngarkesë emocionale, etj., është e gjitha një spekulim. Këto Agjenci të rëndësishme ligjzbatuese si Policia, Prokuroria e Gjykata që jep drejtësi, nëse janë misione të ndershme e të afta profesionalisht, nuk korruptohen nga zyrtarët e shtetit. Pra, pikërisht njerëzit që dalin të pastër nga sistemi do çojnë në ndëshkimin e duhur të gjithë zyrtarëve që kanë abuzuar me pushtetin – ose siç i quani ndryshe ju me të drejtë ‘peshqit e mëdhenj’. Sepse që ‘peshku i madh” të përfundojë aty ku duhet, duhet të ketë rrjetë, dhe rrjeta janë Policia – Prokuroria – Gjykata. Pa këto të treja nuk është e mundur. Pasi nëse njëra prej tyre nuk funksionon, nuk funksionon i gjithë sistemi”, tha ministri i Brendshëm.
/Opinion.al
