Islanda ka bërë një hap prapa përsa i përket dëbimit të familjes shqiptare Pepa, e cila u përzu nga vendi disa ditë më parë edhe pse kishte një fëmijë të sëmurë.
Familja shqiptare e dëbuar, e cila shkaktoi mjaft debat në Islandë mund të marrë nënshtetësinë e këtij vendi pavarësisht se ndodhet në Shqipëri.
Familja Pepa me katër anëtarë, u dëbua javën e kaluar pasi iu refuzua statusi i azilit pavarësisht se kishin një fëmijë të vogël 3 vjeç të sëmurë kronik.
Kjo shkaktoi mjaft debat në opinionin publik dhe në parlament. Madje pati dhe një peticion për shkarkimin e ministres së Brendshme, ku deri tani ka marrë mbi 6 mijë firma.
Mediat islandeze raportojnë se, ndonëse Komisioni i Emigrimit refuzoi statusin e azilit, fatin e tyre do ta marrë në dorë Komisioni Parlamentar për Çështjet Juridike dhe Edukimin.
Gazeta “Kjarninn” shkruan se, familja Pepa ka vendosur të aplikojë për nënshtetësi dhe se Komisioni Parlamentar do ta miratojë një gjë të tillë. Katër anëtarët e familjes Pepa do të bëhen kështu qytetarë islandezë.
Pas dëbimit në shumë intervista, mjekët islandezë u shprehën se, ky ishte një “dënim me vdekje” për 3vjeçarin që vuan nga fibroza cistike.
Kjo bëri që shumë parti politike ta cilësonin si të turpshëm vendimin e Komisionit të Emigrimit.
Vetë ministrja e Brendshme i ka dërguar një letër Komisionit dhe Kryqit të Kuq për të parë sesi është trajtuar kjo çështje.
“Nëse ka mungesë besimi në çështje të tilla të ndjeshme, që shqetëson jetët e njerëzve dhe mirëqenien e tyre, atëherë ne kemi një problem serioz”, tha Olof Nordal.
Ndërkohë një grup për të drejtat e njeriut i quajtur “No Borders Iceland” do të mbajë një koncert për të mbledhur të ardhura për mbrojtjen ligjore e atyre personave që duan të apelojnë vendimin për dëbimin nga Islanda.
