Samir Mane, President i Grupit BALFIN, iu përgjigj sot interesit të treguar nga nxenesit pjesëmarrës në modulin arsimor “Drejtues për një ditë”. 40 të rinj nga shkollat e arsimit të mesëm provuan një ditë pune pranë drejtuesve të kompanive të ndryshme në vend dhe të gjithë patën mundësinë të mësonin nga përvoja e njeriut që ka themeluar një nga grupet investitore më të mëdha në Ballkanin Perëndimor.
Studentët pjesëmarrës në modul e kanë traditë të ndjekin gjatë një dite drejtuesin e një kompanie, në procesin e marrjes së vendimeve dhe menaxhimin e biznesit në përgjithësi. Disa prej tyre patën fatin të kalonin një ditë punë në zyrën e presidentit të Grupit BALFIN.
Gjatë një bisede që mane pati më pas me ta në eventin e organizuar për kulmimin e programit, ai i nxiti të provojnë realizimin e ideve të sipërmarrjes që mund të kenë. Nisur nga nisma personale për ngritjen e një biznesi te themeluar prej tij 30 vjet me pare ne Vjenë të Austrisë, dhe që sot shtrihet në nëntë vende dhe tetë industri të ndryshme, ai i siguroi për mundësitë që kanë të rinjtë sot për vënien në jetë të ideve të sipërmarrjes.
“Padyshim që punën e bëjnë njerzit, sidomos brezi i ri i cili është më shumicë në këta 5000 njerëz që punojnë në Balfin Group. Kemi moshën mesatare 33 vjec dhe kur dëgjova për nismën, thashë që sot do ti thërras vajzat vetë dhe të shohin sesi punon një sipërmarrës. Jam shumë i kënaqur që sot i kisha vajzat në zyrë dhe që morën pjesë në shumë aktivitete. Një pjesë të mirë të raportit e kemi me edukimin. Unë besoj që me pak punë dhe vullnet, besoj që këta njerëz do ja dalin kudo që do shkojnë, jo vetëm në Shqipëri” – u shpreh Mane.
Samir Mane teksa bisedoi me ta, nuk nguroi ti japë këshillat e duhura, ku i nxiti të provojnë realizimin e ideve të sipërmarrjes që mund të kenë. Grupi BALFIN ka krijuar programin B4Students, për fuqizimin e të rinjve dhe përmirësimin e formimit të tyre akademik dhe profesional.
Programi “Drejtues për një ditë” organizohet prej mbi 10 vitesh nga Junior Achievement në Shqipëri dhe tashmë është pranuar si lëndë me zgjedhje në sistemin arsimor. Objektivi kryesor është t’u japë të rinjve aftësi praktike që i ndihmojnë të përballojnë sfidat e tregut të punës. Rreth 1.860 nxënës e studentë në 52 shkolla të vendit kanë marrë gjatë këtij viti njohuri dhe aftësi praktike në edukim financiar e sipërmarrës, që do t’i shoqërojnë në hapat e parë të karrierës.
Drejtuesit e rinj iu bashkuan drejtuesve të vërtetë të kompanive Tirana Bank, Fashion Group Albania, Jumbo, të televizionit SCAN, si dhe vetë Grupit BALFIN, për një ditë, ku u vlerësua këndvështrimi i tyre origjinal dhe guximi për zgjidhjet e dhëna.
