Keni dëgjuar për të folurit në gjumë. Me siguri që keni dëgjuar edhe për të ecurit në gjumë. Ndonjëherë janë përvoja të rralla dhe argëtuese, por të tjera herë është edhe problematike. E sikur të mos mjaftonin këto të dyja, njeriu në gjumë është në gjendje të bëjë edhe gjëra të tjera.
Jua kishte marrë mendja që mund të shkruani mesazhe dhe t’i dërgoni ato teksa jeni në gjumë?
Shpesh herë kur ne flasim apo ecim në gjumë, këto veprime lidhen me përvojat gjatë ditës. Një bisedë, apo një vend që frekuenton shpesh. Ditët e sotme celulari është domosdoshmëri dhe pjesë e pandashme e kujtdo. Për këtë nuk është edhe çudi që të shihni ëndrra me celularë.
Por si ndodh?
Praktikisht, ju dëgjoni tingullin e celularit tuaj kur ju vijnë mesazhe. Pa vetëdije, merrni celularin dhe ktheni mesazh ndërsa jeni ende në gjumë. Kjo mund të ndodhë jo një herë, por disa herë gjatë një nate.
Studiuesit në Villanova kanë dashur të kuptojnë “influencën e teknologjisë në regjimin e fjetjes te studentët universitarë”. Gjithashtu studiuesit deshën të zbulonin nëse ka ndryshim mes studentëve që kanë kthyer mesazhe në gjumë dhe atyre që nuk kanë kthyer. Rreth 400 studentë morën pjesë në studim dhe të dhënat e grumbulluara janë vërtetë interesante.
25.6% e të pyeturve pranuan se kishin folur me mesazhe gjatë gjumit. Nga këta, 72% e tyre nuk e mbanin mend ta kishin kryer veprimin. Pjesa më e madhe e masazheve të dërguara ishin të sikletshme, plot me gabime, dhe ndonjëherë nuk kishin kuptim.
Surpriza më e madhe e studimit ishte që nëse kthen mesazhe gjatë gjumit pa vetëdije, në fakt nuk po bën gjumë të qetë. Në vend të rikuperimit të energjive gjatë gjumit, ato harxhohen. Kjo përkthehet në lodhje dhe mungesë përqëndrimi ditën tjetër. Ndaj për ta shmangur këtë, nuk duhet përdorur celulari në krevat,ose të përdoret sa më pak./Opinion.al
