Ministri i Jashtëm rus Sergey Lavrov është përplasur me një gazetar ukrainas gjatë një konference të përbashkët për shtyp me Ministrin e Jashtëm turk Mevlut Çavusoglu në Ankara.
Gazetari ukrainas e pyeti Lavrovin: “Përveç produkteve të grurit, çfarë tjetër i vodhi Rusia Ukrainës?”
Ai u përgjigj: “ Sa për grurin nuk ka asnjë pengesë apo sfidë të shkaktuar nga Federata Ruse. Zelensky duhet të japë një udhëzim në mënyrë që portet ukrainase të bëhen të sigurta”. Lavrov theksoi se “nuk jemi ne ata që duhet të fajësohemi” për krijimin e një problemi dhe se “topi është në fushën e Ukrainës”.
Ministri i Jashtëm rus nënvizoi se Rusia po diskuton kalimin e sigurt të anijeve me ushtrinë turke.
Zëdhënësi i Ministrisë së Jashtme të Ukrainës iu kundërpërgjigj deklaratave të Lavrov. “Fjalët e Lavrov janë boshe,” tha Oleg Nikolenko përmes Twitter. “Ukraina e ka bërë të qartë pozicionin e saj për portet detare, nevojiten pajisje ushtarake për të mbrojtur vijën bregdetare dhe një mision detar për të patrulluar rrugët e eksportit në Detin e Zi. Rusia nuk mund të lejohet të përdorë korridoret e grurit për të sulmuar Ukrainën jugore”, tha Nikolenko./Opinion.al
