Neurokirurgu i njohur shqiptar Mentor Petrela është një nga personazhet e vitit, i përzgjedhur nga emisioni Opinion. Doktor Petrela, i njohur në qarqet botërore për teknikat e përparuara të operacioneve me pacientin zgjuar, thotë se mjekësia vetë për natyrën e shërbimit që i ofron njerëzimit, është e detyruar të ndjekë të gjithë hapat e zhvillimit.
I pyetur për mjekësinë në Shqipëri, neurokirurgu i njohur shqiptar tha: “Para nja 30 vjetësh kur u bë ekspertiza e parë e Bankës Botërore me dy nga ekspertët më të mirë ia themi ne: ju që jeni ekspertë ndërkombëtarë, si e shihni i thamë, si do të jetë mjekësia në këto 30 vjet. Siç do të jetë populli shqiptar thanë, ata.”
Profesor Petrela po ashtu tregoi dhe momentet e vështira të punës së tij: “Momenti më i vështirë… Nga më të vështirat është komunikimi me familjen kur je përballë një dështimi jo vetëm profesional por edhe dështim me sfidën e sëmundjes. Ai është momenti më i vështirë”.
Sipas tij ai mjek që nuk pranon dështimin e tij, në rast se ka gjatë një ndërhyrje kirurgjikale, është gënjeshtar!
“Nuk ka njeri të pagabueshëm. Kështu që praktikisht mund të vish në pozitën e gabimit edhe për përgjegjësinë tënde edhe për injorancën tënde, por edhe për përgjegjësitë e të tjerëve që ti i mbulon. Ai që nuk e pranon këtë ai nuk është korrekt me profesionin e tij. Ai që nuk e pranon që ka gabuar, është gënjeshtar”.
Pse ke zgjedhur këtë profesion, të kesh në dorë jetën e tjetrit?
“Ka qenë një dëshirë e fshehtë e babait tim, që mundohej të ma ushqente. Por nuk kanë qenë të gjitha elementet që unë të futesha në mjekësi. Unë kam qenë një nga “delet e zeza” që as nuk kam pretenduar që do të shkoja për studimet e larta. Fillimisht u futa në rusisht, pastaj ka qenë profesor Gjata i cili më transferoi tek mjekësia. Është profesion i vështirë që kërkon impenjim dhe studim gjatë gjithë kohës”./ Opinion.al
