Gazetari investigativ ‘News 24’, Artan Hoxha vjen në ‘Opinion.al’ si personazhi më i përfoluar në media përgjatë një jave. Arrestimi i gazetarit Hoxha menjëherë pas deklaratës së dhënë në emisionin ‘Opinion’ në TV Klan, pa mbërritur në shtëpi, ka qenë një nga ngjarjet më të përfolura mbi krimin, median, gazetarinë, show-n politik, dhe besueshmërinë, si asnjëherë tjetër, nëpër rrjetet sociale. Pikërisht kjo arsye, na detyroi, të sjellim gazetarin Artan Hoxha në rubrikën e përjavshme: “Personazhi i Javës”.
Nga Reldar Dedaj
Shumë keq. Data 16 shtator, rreth orës 2:30, është liruar gazetari Artan Hoxha nga Prokuroria e Krimeve të Rënda. Hoxha është thirrur nga prokurori Kulluri, i cili po ndjek çështjen kriminale të zbarkimit të një avioni të vogël italian në fshatin Ishëm të Durrësit, ku dhe do të ngarkohej me bimë narkotike për t’i shkarkuar në Itali.
Ai u mor nga prokurori menjëherë sa përfundoi emisioni televiziv, “Opinion” në TV Klan, ku sapo kishte thënë se “piloti italian Guido Guidi, i kapur në Ishëm, ka deklaruar se do të inspektonte pistën e re të ndërtuar posaçërisht për uljen e avionëve të drogës” dhe se “pas kësaj do të transportonte 200 kilogramë kanabis”.
Dëshminë e gazetarit, Prokuroria e ka konsideruar ‘prishje të provave në krim”. Me arsyen, sipas prokurorit, duke u shpallur një dëshmi e tillë, “mafiozët e tjerë që presin drogë ose dërgojnë drogë nga Shqipëria, marrin sinjale dhe ndërtojnë strategji të reja”.
Pak a shumë kjo ishte e gjitha. Gazetari Hoxha u mor në pyetje përreth tre orë dhe pas kësaj u la i lirë. Artan Hoxha është një gazetar shumë aktiv në fushën e kallëzimit të krimit, madje duket më shumë aktiv se sa vetë krimi; nganjëherë bëhet i pabesueshëm me volumin e dëshmive pa dëshmuar prova. Por kjo është kontrata e besueshmërisë së gazetarit me qytetarët. Nëse publiku e beson deklaratën e tij, mbështetur në burime anonime, ose jo, është çështje e profilit të gazetarit.
Me të dalë nga Prokuroria, media, hodhi dyshime të forta për shoqërimin dhe sekuestrimin e mjeteve të punës së tij, celularët, ku mbi gjithçka, po sipas tyre, ka mendime bindëse mbi përdorimin politik të Prokurorisë dhe dështimin e menduar të ndonjë hetimi. Vetë gazetari Hoxha deklaroi se avioni italian duhej të ishte një nga çështjet kryesore deri sa të zbulohet trafiku ndërkombëtar që kërkon ta kthejë Shqipërinë në një pistë të trafikimit të drogës.
Mirëpo, Prokuroria, në vend që të merrej se kush është autori i këtij organizimi, se kush fshihet mbrapa këtij aktiviteti që xhiron miliarda euro në vit, merren me gazetarin se më kë ka kontaktuar ky gazetar dhe çfarë ka thënë ai. Sigurisht, gazetari Hoxha, ka deklaruar se jam kthyer në një lajm që nuk do doja t’i ndodhte asnjë kolegu.
“Problemi im me Prokurorinë është ky. Jo pse kam dhënë informacion shumë të saktë, pasi deklaratat e mia janë 100 % të sakta, por problemi im është se ku e kam gjetur këtë informacion kaq të saktë”, u shpreh ai në një studio televizive.
Nuk është çudi që gazetarët shihen si njerëz që gënjejnë për qëllimet e tyre. Njerëzit e zakonshëm mendojnë se sistemi është i manipuluar, që mediat nuk janë aty për popullin, por, më tepër, për paratë. Këtij mendimi, hëpërhë, nuk mendojmë t’i ketë shpëtuar edhe vetë ai. Kjo është koha e mosbesimit. Ka ndodhur edhe më parë, me shumë gjasa do vazhdojë edhe në të ardhmen, që gazetarët të jenë kaq shumë të dyshuar për të ‘vërtetat’ e tyre.
Po ashtu edhe për gabimet. Njerëzit kanë shumë të drejtë të dyshojnë për ato që gazetarët thonë. Pavarësisht kësaj, gazetarët, nuk e kanë aspak ndërmend të frikësohen. Në qoftë se ata i vihen seriozisht punës për të zbuluar se si sillet jeta, duhen të jenë plotësisht të përgatitur për të korrigjuar gabimet. Dhe, nëse iu është mbushur mendja, top, për t’i korrigjuar ato, më parë duhet të jenë plotësisht të qartë se do të bëjnë gabime.
