Në Rumani po përsëriten këtë të dielë, zgjedhet presidenciale të 24 nëntorit, të anuluara pas fitores së papritur të radikalit të djathtë pro-rus Kalin Xhorxhesku.
Sondazhet parashikojnë fitoren e Xhorxh Simionit, kandidatit nacionalist po ashtu pro-rus i cili edhe në zgjedhjet e Nëntorit parashikohej të fitonte, pavarësisht se rezultatet treguan një tjetër realitet.
Pas triumfit të Xhorxheskut, Simion shpalli mbështetjen për radikalin e djahtë në raundin e dytë të balotazhit në dhjetor të vitit të kaluar, që Gjykata Kushtetuese vendosi të mos zhvillohej. Nderin, Xhorxhesku po ia kthen këtë të dielë, ku u shfaq duke votuar në krah të Simionit në Bukuresht.
Mes kandidatëve të tjerë është edhe Elena Laskoni, e cila doli e dyta në zgjedhjet e anuluara të nëntorit dhe tani kandidon si e pavarur pasi partia liberale që kryeson zgjodhi një tjetër kandidat, kryebashkiakun e Bukureshtit, Nikushor Dan, i cili pritet të dalë në balotazh më 18 maj përballë nacionalistit Xhorxh Simion. Në garë është edhe Krin Antonesku, përfaqësues i socialdemokratëve në qeveri. Në garë janë edhe 7 kandidatë të tjerë.
Nëse fitojnë, nacionalistët kanë paralajmëruar se do të tërheqin mbështetjen ushtarake të Rumanisë për Ukrainën, jetike për Kievin nga një vend kufitar, anëtar i NATO-s. Mbështetja për ta është në rritje pasi shihen si shpëtim mes rritjes së kostove të jetesës nga lufta në Ukrainë.
