Telashe për Luiza Gegën, sportisten e vetme ku pritshmëritë janë të larta për kuqezinjtë. Ku duhen edhe 24 orë nga gara e saj në 3000 m/p, atletja po përballet me një shqetësim të hershëm në tendinën e Akilit. Lajmin e konfirmon për gazetën “Panorama Sport”, trajneri Taulant Stërmasi, i cili shpreh pasigurinë nëse do të jetë në 100 për qindëshin e saj ditën e garës.
Sic kam njoftuar edhe më parë, pas garës eliminatore në Europian, dhe më tepër në finale, Luiza ka ndier shqetësim në tendinën e Akilit. Gjatë periudhës së stërvitjes, jemi munduar duke bërë terapi dhe sikur dhimbja filloi të zhdukej, por jo plotësisht. Fatkeqësisht gjatë kësaj kohe stërvitjeje në Korçë dhe në Dardhë stërvitja me pengesa ishte më e limituar, pasi ky ishte rekomandimi i mjekut.
Pas ardhjes në Rio kemi pasur ditë të lodhshme për shkak të udhëtimit të gjatë, prej 23 orësh, dhe pas disa orëve të mbërritjes ishte ceremonia, e cila edhe ajo zgjati më shumë se 7-8 orë. Ne i jemi rikthyer stërvitjes menjëherë ditën tjetër në qendrat stërvitore. Ndërkohë, para tri ditëve dhimbja ka ardhur duke u shtuar në tendinën e Akilit”, zbulon trajneri i Kombëtares.
KONTRAKTIMI
Sipas Stërmasit, atletja ndien kontraktim çka e penalizon për një vrapim të lehtë. “Që kur kemi ardhur kemi bërë terapi dhe vazhdojmë të jemi në terapi intensive. Por nuk e di nëse deri në ditën e garës Luiza do të jetë 100 për qind OK me këmbën. Dhimbja e tendinës krijon shqetësim nga pulpa deri në tërheqje dhe kontrakton shumë më tepër këmbën e majtë duke mos e lënë sportisten që të vrapojë lirshëm.
Të gjithë do të mundohemi që Luiza të mos shfaqë probleme me këmbën, ditën e garës”. Gara – Tekniku Stërmasi parashikon një konkurrencë të fortë. “Në lidhje me garën desha të them që konkurrenca është shumë e fortë, pasi do të garojnë 56 atlete në disiplinën e 3000 m me pengesa. Gara do të ndahet në tre bateri. Deri tani, nuk kanë dalë bateritë, pasi disa shtete ende nuk kanë deklaruar atletet, se kush do të marrë pjesë në garë ose jo.
Më vjen keq që situata është agravuar, pasi ka pasur impenjimin maksimal nga atletja për një përfaqësim sa më të mirë dhe sigurisht për të bërë rezultatin më të mirë të vetin në Lojërat Olimpike”, e mbylli deklaratën e tij trajneri Stërmasi. Gega vjen në këtë pjesëmarrje olimpike si nënkampione Europe./Panorama Sport/
