PRISHTINË- Albin Kurti ka qendruar dje në mes të protestuesve edhe ishte person i shpallur në kërkim nga policia. Mediat në Kosovë duke bërë bilancin e protestës së dhunshme dje në Prishtinë, shkruajnë se “veç liderëve të partive politike opozitare, Visar Ymeri, Ramush Haradinaj, Fatmir Limaj për një kohë në protestë ka qëndruar edhe deputeti Albin Kurti i cili është duke u kërkuar nga policia për arrestim”.
Protesta mori shkas nga arrestimi i djeshëm i deputetes së Aleancës për Ardhmërinë e Kosovës Donika Kadaj- Bujupi. Gjykata Themelore në Prishtinë ka lëshuar dje urdhër-arrestet për katër deputetë të parlamentit, Albin Kurtin, Albulena Haxhiun dhe Faton Topallin nga Lëvizja Vetëvendosje.
***
Rreth 22 persona janë arrestuar, më shumë se 13 të tjerë kanë pësuar lëndime dhe janë shkaktuar dëme të konsiderueshme materiale. Ky është bilanci i protestës së ditës së mërkurë.
Njësia speciale e Policisë se Kosovës ka hedhur gaz lotsjellës në drejtim të aktivistëve të partive politike opozitare, të cilët fillimisht ishin mbledhur para Qeverisë së Kosovës në Sheshin Nënë Tereza në Prishtinë dhe në sheshet e tjera të kryeqytetit.
Radio Europa e Lirë citon policinë e cila evidenton se si pasojë e dhunës janë lënduar shtatë zyrtarë policor. “Një veturë zyrtare është djegur, katër vetura të policisë janë dëmtuar, por ka edhe dhjetëra vetura zyrtare të institucioneve tjera që janë dëmtuar”, eshtë shprehur Baki Kelani zëdhënës policie.
Dëme të shkaktuara ka edhe në ndërtesën e qeverisë se Kosovës, po ashtu ka disa informacione se ka dëmtime edhe të shtatores se presidentit “Ibrahim Rugova” ku dyshohet se janë dëmtuar disa shkronja të emërtimit.
Nga ana tjetër, drejtori i Klinikës Emergjente në Qendrën Klinike Universitare të Kosovës, Basri Lenjani, ka bërë të ditur për Radion Evropa e Lirë, se gjatë ditës së djeshme 10 persona kanë marrë lëndime trupore, në ekstremitetet e sipërme dhe të poshtme dhe në bosht kurrizor, në gjoks dhe bark, dhe lëndimet janë shkaktuar me mjete të forta.
***
Partitë opozitare në Kosovë për gati dy muaj po pengojnë mbajtjen e seancave të Parlamentit sepse kundërshtojnë marrëveshjet e arritura në bisedimet me Serbinë në fund të muajit gusht. Sipas marrëveshjes komunave me shumicë serbe u ofrohet një shkallë e gjerë autonomie. Opozita kundërshton edhe marrëveshjen për shënimin e kufirit me Malin e Zi.
