Një nga vendet më të vaksinuara në botë po përjeton një shpërthim të Covid-19.
Ndërsa shtetet e tjera po përpiqen të sigurojnë vaksina të mjaftueshme, Seishel janë në pozitë për t’u patur zili sepse kanë imunizuar me të dyja dozat më shumë se 61.4% të popullsisë. Por kjo nuk ka mjaftuar për të ndaluar përhapjen e Covid.
Gjatë muajit të kaluar, numrat e infektimeve janë rritur në arkipelagun e Oqeanit Indian, duke bërë që autoritetet të vendosin kufizime në vendin e 98,000 banorëve. Të dhënat e bëra publike të enjten tregojnë se ka më shumë se 2,700 raste aktive.
Nga rastet aktuale aktive, 33% janë vaksinuar plotësisht, sipas Ministrisë së Shëndetësisë.
Ekspertët dhe zyrtarët lokalë, megjithatë, thonë se shpërthimi I Covid në Seishel nuk është një shenjë se vaksinat nuk po funksionojnë.
Sido që të jetë, shteti tropikal është një kujtesë se edhe vendet me nivele të larta të vaksinimit nuk mund të heqin dorë nga mbrojtja kundër Covid.
Situata në Seishel
Pak më shumë se një muaj më parë, Seishel ishte një vend aq i sigurt me trajtimin e Covid-19 saqë hoqi kufizimet për shumicën e turistëve.
Me pak raste dhe një fushatë vaksinimi masiv në zhvillim, vendi i varur nga turistët rihapi kufijtë e tij për pothuajse të gjithë udhëtarët ndërkombëtarë, që do të thotë kushdo me një test negativ PCR mund të hyjë në vend pa karantinuar. Ishte një hap vendimtar për një vend ku turizmi gjeneron direkt ose indirekt rreth 72% të PBB-së dhe punëson më shumë se 30% të popullsisë. Deri në atë moment, vendi kishte raportuar më pak se 3,800 raste dhe 16 vdekje.
Që atëherë, rastet totale janë dyfishuar në 9,184 raste dhe 32 vdekje, sipas shifrave të Ministrisë së Shëndetësisë të lëshuara në një konferencë shtypi të Enjten.
Nuk është e qartë se çfarë çoi në përhapjen, megjithëse Sylvestre Radegonde, Ministri i Punëve të Jashtme dhe Turizmit, tha se virusi ka gjasa të ketë qenë në vend gjatë gjithë kohës dhe ishte përhapur pasi vaksinimi i bënte njerëzit më të shkujdesur. Gjurmimi dhe testimi i përmirësuar i kontakteve gjithashtu i kishte ndihmuar autoritetet të kapnin më shumë raste.
“Gjatë muajve të fundit, pas vaksinimit, njerëzit kanë parë që çdokush që infektohet nuk po sëmuret rëndë, askush nuk po vdes, askush nuk ka shumë ndërlikime,” tha ai.
Seishel po përdor vaksinën kineze Sinopharm dhe Covishield një variant i AstraZeneca, prodhuar në Indi. Nga të gjithë njerëzit e vaksinuar plotësisht, 57% morën Sinopharm, e cila iu dha personave të moshave nga 18 deri në 60 vjeç, ndërsa 43% morën Covishield, e cila iu dha personave mbi 60 vjeç.
Rreth 37% e rasteve pozitive që nga 8 maji ishin vaksinuar plotësisht, tha qeveria, megjithëse nuk ka publikuar të dhëna se cilat vaksina kanë marrë. “Rreth 20% e atyre që u shtruan në spital për trajtim ishin vaksinuar, por rastet e tyre nuk ishin serioze”, tha Ministria e Shëndetësisë të hënën. Pothuajse asnjë nga rastet kritike dhe të rënda që kërkojnë kujdes intensiv nuk ishin vaksinuar dhe askush që është vaksinuar nuk ka vdekur nga Covid-19.
Radegonde tha të enjten se vetëm dy persona në gjithë vendin janë në kujdes intensiv.
“Përfundimi është se vaksinat po mbrojnë njerëzit. Ata që janë vaksinuar nuk po zhvillojnë ndonjë komplikacion,” tha Radegonde. “Ne mbetemi të sigurt se vaksinat – të dyja – e kanë ndihmuar vendin. Gjërat do të kishin qenë më keq”, u shpreh ai./Opinion.al
