Kryeministri Edi Rama i cilësoi përplasjet nëpër KZAZ si “revolucion imagjinar me punonjësit e bashkive blu”.
“Fatkeqësisht asgjë e paparashikuar! Vijon revolucioni imagjinar me punonjësit e bashkive blu. I pyes:A ia vlen të kryeni krime zgjedhore e të përballeni me ligjin për ata që e katandisën PD-LSI në këtë derexhe dhe duan ta bëjnë hallin e tyre me drejtësinë hall të Shqipërisë? Zero!”, shkruan Rama në Twitter.
Mbështetës të opozitës sulmuan Komisionet Zonale të Administrimit të Zgjedhjeve, Numër 16 në Burrel. U përplasën me policinë, duke kërkuar lirimin e ambienteve, në mbështetje të dekretit të Presidentit Ilir Meta, për anulimin e zgjedhjeve të 30 Qershorit.
Në mbështetje të Forcave të Rendit, që thonë se po zbatojnë me përpikmëri ligjin për të mbrojtur KZAZ-të, erdhën Forcat e Ndërhyrjes së Shpejtë. Nga përplasja pati disa të plagosur. Por protestuesit arritën t’i nxjerrin nga KZAZ-ja materialet zgjedhore dhe u vunë flakën.
https://www.facebook.com/opinioni.al/videos/449617265822863/
Pas kësaj, bllokuan rrugën nacionale dhe u drejtuan në Klos, ku gjithashtu sulmuan KZAZ-në numër 17. I nxorën materialet jashtë dhe i dogjën. Tensionet pati edhe Bashkinë e Kukësit. Pasi protestuesit tentuan të bllokojnë mbledhjen e materialeve zgjedhore, policia i ka nxjerrë ato vullnetarisht.
Incidente u regjistruan edhe në KZAZ Nr 27 në Kamëz.
Forcat e Ndërhyrjes së Shpejtë kanë përdorur sprai lotsjellës për të shpërndarë turmën. Si pasojë u lënduan 2 policë bashkiakë. Situatë më e tensionuar ka qenë edhe nëPogradec, ku protestuesit janë përpjekur të marrin në kontroll mjediset e KZAZ-së.
Një ditë më parë në Shkodër, punonjës të bashkisë të mbështetur nga protestues të opozitës, i vunë vënë flakën KZAZ numër 3, e cila ndodhet në ambientet e shkollës së mesme “Shejnaze Juka”. Në Tropojë po ashtu u sulmua KZAZ-ja e vendosur në Muzeun Historik./ Opinion.al
