Kryetari i Partisë Demokratike, Lulzim Basha ka reaguar në lidhje me përplasjet e zhvilluara ditën e sotme në bashkinë e Kamzës, ku kryebashkiakut i zgjedhur nga 30 qershori, Rakip Suli, i cili hyri me forcë brenda godinës.
Përmes një postimi në “Facebook”, Basha shprehet se Suli e zaptoi bashkinë e Kamzës me ndihmën e Sali Skurës, këtë të fundit kryedemokrati e cilëson si bandit.
Kreu i selisë blu shkruan në reagimin e tij se “Rakip Suli ky hajdut i milonave të shqiptarëve me tendera dhe qira që i përfitoi kur ishte deputet në konflikt të pastër interesi, duhet të ishte ndjekur penalisht dhe dënuar.”
Lideri i opozitës shton se përsa kohë Rama është kryeministër në Shqipëri nuk do të ketë demokraci dhe drejtësi.
Reagimi i Bashës
Hajduti Rakip Suli me ndihmën e banditit Sali Skura dhunuan dhe zaptuan sot me forcë selinë e Bashkisë Kamëz. Për dhunën hajdutërore të dy këta kriminelë do të përgjigjen shpejt para ligjit! Uroj për të mirën e tyre dhe të Hajdutit Psiqik, që ajo ditë të vijë më shpejt se dita e përballjes me zemërimin e popullit!
Rakip Suli ky hajdut i milonave të shqiptarëve me tendera dhe qira që i përfitoi kur ishte deputet në konflikt të pastër interesi, duhet të ishte ndjekur penalisht dhe dënuar. Sali Skura i dosjes 184 që ngrinte postblloqe për të ndaluar votuesit e opozitës duhet të ishte në burg.
Por sa kohë Edi Rama është në zyrën e kryeministrit, nuk do ketë as drejtësi dhe as demokraci, banditët, kriminelët dhe hajdutët do të sundojnë Shqipërinë.
Shporrja e Hajdutit Psiqik dhe bandës së tij është jetike për sigurinë dhe jetën e çdo familje shqiptare!/ Opinion.al E.Xh.
