Çështja e emigracionit ka çuar në një tjetër përplasje mes Francës dhe Italisë që kur Giorgia Meloni u bë kryeministre e Italisë.
Ka qenë ministri i Brendshëm Francez Gerald Darmanin, i cili e ka akuzuar kryeministren e Italisë, Giorgia Meloni se është e paaftë të zgjidhë krizën e emigracionit për të cilën ajo kishte bërë fushatë.
“Meloni, që udhëheq një qeveri të ekstremit të djathtë të zgjedhur nga miqtë e zonjës Le Pen, është e paaftë të zgjidhë problemet për të cilat u zgjodh.Meloni është si Le Pen, ajo zgjidhet duke thënë “do ta shihni” dhe më pas ajo që shohim është se kriza e emigracionit nuk ndalet, përkundrazi përkeqësohet.”
Deklaratat e ministrit francez erdhën ndërsa ministri i jashtëm italian Antonio Tajani po përgatitej të fluturonte për në Paris në një takim që kishte si qëllim përmirësimin e marrëdhënieve midis dy vendeve të Bashkimit Evropian.
Franca lëshoi shpejt një deklaratë në të cilën kërkonte të siguronte Italinë për gatishmërinë e saj për të punuar ngushtë me Italinë për këtë çështje të përbashkët, por pavarësisht nga kjo ministri i Jashtëm italian njoftoi anulimin e takimit të planifikuar me homologen e tij franceze Catherine Colonna, e cila më parë ishte ambasadore franceze në Romë.
Tajani, vizita e të cilit në Francë do të riplanifikohet, shkroi në Twitter: “Ofendimet ndaj qeverisë dhe Italisë të shqiptuara nga ministri Gérald Darmanin janë të papranueshme. Kjo nuk është fryma në të cilën duhet të trajtohen sfidat e përbashkëta evropiane.”
