Pas 13 orësh debate të ashpra, senati amerikan ka aprovuar rregullat bazë të procesit gjyqësor për shkarkimin e presidentit amerikan Donald Trump. Senatorët u betuan po ashtu se do jenë të pavarur në procesin e drejtuar nga kryetari i Gjykatës së Lartë, John Roberts.
Sipas rregullave të aprovuara, argumentet fillestare do të parashtrohen gjatë së mërkurës, me secilën palë që do të ketë në dispozicion 24 orë përgjatë 3 ditëve të ardhshme.
Me 53 vota pro dhe 47 kundër, senati refuzoi tre përpjekje të demokratëve për të paraqitur dokumente ose prova të reja gjatë gjyqitsi dhe bllokuan një mocion të liderit të pakicës në senat, Chuck Schummer, që kërkonte dorëzimin e dokumenteve nga Shtëpia e Bardhë lidhur me çështjen e Ukrainës.
U refuzua gjithashtu kërkesa për të dhëna dhe dokumente nga Departamenti Amerikan i Shtetit dhe zyra e buxhetit në Shtëpinë e Bardhë.
Ndërkaq në nisje të seancës, Adam Schiff, ligjvënësi i Dhomës së Përfaqësuesve që drejton procesin e “impeachment”, tha se shumica e amerikanëve nuk beson se ky do të jetë një gjyq i drejtë.
“Shumë njerëz, madje pjesa me e madhe e amerikanëve nuk besojnë se ky do të jetë një gjyq i drejtë. Ata nuk besojnë se Senati do të jetë i paanshëm, mendojnë se rezultati është i paracaktuar”, deklaroi Schiff.
Donald Trump akuzohet për abuzim me pushtetit dhe pengim të punës së Kongresit, megjithatë Senati kontrollohet nga republikanët dhe nuk pritet që presidenti të shpallet fajtor./Opinion.al
