Kryetari i Partisë Demokratike, Lulzim Basha është përplasur verbalisht në seancën e sotme plenare, me ministrin e Brendshëm. Sandër Lleshaj.
Shkak u bë fillimisht fjala e Bashës, i cili e cilësoi situatën e rendit në vend katastrofike, duke përmendur edhe rastin e Kavajës, ku një minorene u abuzua seksualisht nga 8 shokë të shkollës.
Ministri Lleshaj, i ka kujtuar z. Basha, periudhën kur ky i fundit ishte ministër i Brendshëm, dhe se në ndërgjegjen e tij mbante katër të vrarë dhe qindra të plagosur, duke iu referuar protestës së 21 Janarit 2011.
“Zoti Basha ju falënderoj që me dhatë mundësinë përmes gishtit tregues t’ju përgjigjem, mos u mundo ta tregosh kurrë ndaj meje. Ironia e historisë bën që ju të përdorni pafund bojë të zezë për të nxirë Shqipërinë, por përpjekja juaj është butaforike. “Nuk do arrish kurrë të më shohësh si ty në 2011, që le 4 viktima në bulevard. Sa herë të tregosh gishtin butaforik drejt meje, kujto historinë ke 4 të vrarë, mbi 100 të plagosur 4000 në tentativë për ti vrarë se ju lëshove plumbat mbi kokë, mendohu mirë”
I menjëhershëm ka qenë edhe reagimi i Z. Basha, i cili e ka cilësuar ministrin Lleshaj, si “budallai që tregon me gisht hënën”, dhe se ishte kthyer në një vegël qorre të Ramës, që fliste çfarë i thoshte shefi. D.l
