I ngarkuari me punë i Shqipërisë në Vatikan, Visar Zhiti, ka reaguar pas akuzave të Presidentit Nishani se poeti ka qenë spiun i të burgosurve në burgun e Spaçit. “Unë nuk e di kush është i përndjekuri P.V. Atë duhet ta dijë presidenti. Nuk kam spiunuar të burgosurit, kam refuzuar dhe ka një dokument të bërë publik për këtë. Me administratën e burgut kam pasur atë marrëdhënie që kishte një i burgosur me administratën e burgut dhe me komandën. Madje kam punuar si skllav”, tha Zhiti për GSH.
Një ditë më parë, Presidenti e quajti Visar Zhitin si person me luhatje psiqike si dhe deklaroi se ka marrë letra nga ish-i përndjekuri politik P.V., i cili e akuzonte Zhitin si bashkëpunëtor të administratës së burgut të Spaçit”.
Në përgjigje të akuzave të Nishanit, Zhiti thotë: Presidenti i ka të gjitha strukturat dhe mekanizmat dhe dosjet dhe kanalet e fshehta e të pafshehta dhe s’ka pse flet me “letra nga populli” apo kundërpopulli, apo të spiunëve të dikurshëm, ashtu siç bënte diktatori Enver Hoxha, më saktë si karikaturë e tij. Të flasë me prova, dokumente, institucionalisht.
Ai është Presidenti i vetëm në botë që flet kundër qytetarit të vendit të tij pa asnjë provë e dokument, por me zemërim e shpifje. Dhe më ka dekoruar dikur. Ia kam refuzuar, por e mora për të mos vënë në vështirësi bashkëvuajtësin tim, zotin Amik Kasoruho, që punonte në Presidencë dhe më propozoi. Kam dashur ta kthej, por nuk e kam gjetur ku e kisha hedhur. Ndërkohë më ka dekretuar dhe si ministër vite më parë…
