Sokol Kushta deklaroi dy ditë më parë, në një intervistë për “Panorama Sport”, se Federata Shqiptare e Futbollit nuk i kishte dhënë as biletë për ndeshjen me Spanjën, edhe pse është një nga dy futbollistët që kanë arritur të shënojnë gol ndaj përfaqësueses iberike. Ikona vlonjate realizoi në humbjen 15, duke ndëshkuar Zubizarretën.
“Çfarë fitova nga vendi im?! As një biletë dhe kjo që po them është figurative. Realiteti është se nuk fitova asgjë, përveç respektit të njerëzve kudo që vete. Kjo nuk është vetëm për mua. Të gjithë shokët e mi bashkëlojtarë të Kombëtares këto fjalë thonë, këto gjëra ndiejnë. Presidenti e filloi mirë me kampionatin europian. Bravo se të gjithë e meritojnë se kanë dhënë për Kombëtaren, por duhet ta vazhdojë që ne të jemi gjithnjë në raporte të tilla respekti. Nga ne futbolli nuk humbet, qoftë dhe 100 bileta falas, por fiton shumë”, tha ai. Ndërkohë, ka reaguar edhe sekretari i përgjithshëm i FSHFsë, Ilir Shulku. I kontaktuar nga gazeta, ai ka mohuar që Kushta të mos ketë biletë, madje deklaron se ka pasur telefonatë personale me të për këtë çështje. “Nuk dua të reagoj për asgjë që është thënë në media, sepse unë Kushtën e kam shok. Megjithatë, më ka kontaktuar mua personalisht dhe unë vetë ia kam rezervuar tri bileta. Në momentin që ju më kontaktuat, unë verifikova sistemin dhe pashë që është printuar bileta me emrin e tij. Gjithashtu edhe dy biletat e tjera që më ka kërkuar”, ka thënë Ilir Shulku
Kushta: Gënjejnë, pagova 540 mijë lekë për biletat Sokol Kushta nuk është ndalur me deklaratën e tij, por ka komentuar sërish sa i përket çështjes së biletës. Duke mësuar edhe se çfarë kishte shprehur sekretari i përgjithshëm i FSHFsë, vlonjati ka deklaruar se nuk është e vërtetë që të ketë marrë biletë nga institucioni i futbollit, si shenjë nderimi për kontributin që ka dhënë në ekipin përfaqësues. Por, shprehet se ka paguar 180 mijë lekë vetëm për një biletë, për të qenë në stadium për duelin e sotëm. “E shikoj se dikush në FSHF do të më nxjerrë edhe gënjeshtar. Në qoftë se janë mësuar me gënjeshtra, t’i mbajnë për vete, por turpi s’ka kufij. Unë nuk kam thënë s’kam bileta, por unë kam paguar plot 540 mijë lekë për tri bileta dhe duhet ta kuptojë kush ka dalë të gënjejë në opinion, që e blera me të dhënën janë plot 540 mijë lekë larg. Faleminderit për respektin”, ka deklaruar ishsulmuesi.
