Të enjten në media u publikua deklarata e deputetit gjerman Johann David Wadephul, i cili thoshte se në analizën fillestare të bërë për Shqipërinë rezultonte se vendi nuk ka përmbushur asnjë nga kushtet për hapjen e negociatave për anëtarësim.
Ditën e sotme një tjetër deputet gjerman i CDU, Olav Gutting, ka reaguar në lidhje me Shqipërinë përmes një deklarate të postuar në Twitter. Ndryshe nga homologu i tij, Gutting përshëndet progresin e bërë nga Shqipëria në perspektivën e saj drejt BE dhe bën thirrje që raporti i Komisionit Europian të shihet pozitivisht për hapjen e negociatave. Gjithashtu deputeti gjerman shkruan se mesazhet e dërguara nga Gjermania për Shqipërinë duhet të jenë më të përmbajtura, kryesisht kur kanë të bëjnë me datën e zgjedhjeve lokale.
“Përplasjet e brendshme janë shqetësuese, por ne duhet të jemi të kujdesshëm në këshillat që japim për Shqipërinë, përshembull kur është fjala për datën e zgjedhjeve”, shkruan Gutting.
Përplasja Rama – Basha ka arritur të reflektohet deri në Berilin ku mesa duket deputetët e koalicionit qeverisës në Bundestag kanë qëndrimet e tyre të ndryshme në lidhje më krizën politike në Shqipëri. Në reagimet e deputetëve gjermanë vihen re dhe perspektivat e ndryshme nga ata e shohin gjendjen në Shqipëri. Deputeti Wadephul i referohet faktorëve të brendshëm dhe shpreh rezervat e tij në lidhje me vendimin që do të marrë Bundestagu. Ndërkohë në reagimin e sotëm çështja e Shqipërisë shihet në një kontekst më të gjerë në lidhje me sa ka arritur Shqipëria deri tani në rrugën drejt Europës si përshembull hyrja në NATO dhe marrja e rekomandimit nga Komisioni. /Opinion.al
