TIRANE- Dy biznesmenë ndërtimi janë arrestuar javën që kaloi me bujë nga policia por prokuroria i ka liruar menjëherë duke e konsideruar të paligjshëm arrestimin e tyre. Madje ka pasur edhe një debat personal mes shefit të komisariatit nr.2 në Tiranë dhe prokurores Anila Galanxhi.
Siç shkruan gazeta “Panorama”, prokurorja ka informuar Kryeprokurorin Llalla pasi ëshët telefonuar dhe i është kërkuar llogari nga shefi i komisariatit për lirimin e biznesmenes së ndërtimit Nadire Qinami. Ajo u arrestua më 17 shkurt 2016, nga Policia e Tiranës me akuzën e ndërtimit pa leje. Pasi mori çështjen në shqyrtim, prokuroria konstatoi se sipërmarrësja ishte dënuar një herë për godinën që policia e akuzonte si ndërtim pa leje.
Po kështu, dy vendimet e INUV pranë Bashkisë së Tiranës ishin ankimuar nga Nadire Qinami në Gjykatën Administrative. Kjo e fundit kishte rrëzuar në Shkallë të Parë dhe në Apel urdhrat e INUV për pezullimin e punimeve në godinën që u bë objekt i akuzës së re të policisë për sipërmarrësen.
Ndodhur në këto kushte, prokuroria ka urdhëruar lirimin e Nadire Qinamit, duke e konsideruar arrestimin të paligjshëm.
Pas incidentit mes policisë dhe prokurorisë, të ndodhur pak ditë më parë, është shënuar edhe një tjetër rast i ngjashëm i arrestimit të paligjshëm të një biznesmeni dhe lirimit të menjëhershëm nga prokuroria.
Biznesmeni Arben Reli është arrestuar me bujë të premten për “ndërtim të paligjshëm” në një kompleks godinash në Farkë. Prokuroria e Tiranës, pas referimit të materialeve nga policia, ka konstatuar se arrestimi ishte kryer në mënyrë të paligjshme. Kjo pasi biznesmeni rezultonte subjekt zhvillues në kompleksin në ndërtim në Farkë për të cilin ishte nxjerrë një urdhër për ndalim punimesh. Arben Reli, sipas verifikimeve, kishte kontraktuar një subjekt tjetër për kryerjen e punimeve.
