Në Kosovë janë duke u zhvilluar takime intensive për heqjen e taksës ndaj Serbisë. Kështu sot pasdite në orën 18:30 përfundoi takimi i thirrur në Presidencë nga Hashim Thaçi, ku morën pjesë Kryeministri Ramush Haradinaj si dhe Fatmir Limaj, Behgjet Pacolli, Kadri Veseli, Shpend Ahmeti. Në takim ishte edhe ambasadori francez, Didier Chabert. Ndërsa më herët gjatë ditës janë zhvilluar takime të njëpasnjëshme dhe me ambasadorin e SHBA-ve në Prishtinë, Kosnett. Duhet theksuar se është pikërisht ambasdori Philip Kosnett që insiston dhe kërkon vazhdimisht pezullimin e taksës 100 për qind ndaj Serbisë. Pasi kanë dalë nga selia e Presidencës asnjë prej liderve politikë nuk është prononcuar për mediat.
Telefonata e Thaçit me John Bolt
Ndërkaq Presidenti Thaçi prej disa kohësh kërkon heqjen e taksës, pasi sipas tij po dëmtohen raportet me SHBA-në. Pasditen e sotme, përmes një statusi në facebook ai bën të ditur se ka patur bisedë me zyrtarin e lartë amerikan, John Bolton.
“Këtë pasdite kisha një bisedë telefonike me Këshilltarin për Siguri Kombëtare në Shtëpinë e Bardhë, ambasadorin John Bolton. Ne biseduam për dialogun ndërmjet Kosovës dhe Serbisë, si dhe për partneritetin e përhershëm në mes të Kosovës dhe SHBA-së. Ambasadorin Bolton e sigurova se Republika e Kosovës mbetet e përgjegjshme për vazhdimin e dialogut dhe do të flasë me një zë, ashtu siç ka kërkuar Presidenti Trump. Ne jemi të bindur se dialogu do të fillojë së shpejti dhe do të përfundojë me një marrëveshje gjithëpërfshirëse, që siguron njohjen reciproke dhe anëtarësimin në NATO, BE dhe OKB”.
Duket se këtë kërkesë të SHBA-ve Thaçi ua ka paraqitur në takim liderve politikë, por deri më tani nuk dihet nëse ka arritur dakordësinë me Haradinajn për heqjen e taksës ndaj Serbisë.
Pas takimit të zhvilluar në Presidencë nuk ka asnjë deklaratë nga vetë z. Haradinaj, Pacolli apo Veseli.
Por, ditë më parë Kryeparlamentari Veseli është dukur i luhatur, dhe ndryshe nga anëtaret e koalicionit ai ka kërkuar pezullimin e taksës ndaj Serbisë së paku për 120 ditë.
Sakaq, po i qendron fort presionit amerikan për të mos hequr taksën, Kryeministri Haradinaj. Deri më tani ai ka shprehur vendosmërinë për të mos e hequr taksën derisa Serbia të njohë Pavarësinë e Kosovës. Po kështu, Haradinaj lë të hapur mundësinë e prishjes së koalicionit qeverisës.
“Nëse mospajtimet politike vazhdojnë, mund të rezultojnë edhe me të arritura të tjera, çfarëdo qofshin ato. Vendosja e taksës është vendim sovran. Nuk është kundër dialogut, por për t’i kërkuar Serbisë një qasje të re në raport me Kosovën. Serbia ka marrë plotë vendime të brendshme, por nuk kanë qenë kusht që ne të mos ulemi në tavolinë”, është shprehur një ditë më parë Haradinaj.
/Ri-De
*Në foto lideret politik duke dale nga Presidenca pasditen e sotme
