Kryetari i Bashkisë së Tiranës Erion Veliaj i ftuar në “Top Channel”, ka folur në lidhje me përplasjen mes UBT-së dhe Bashkisë së Tiranës për ndërtimin e një shkolle.
Universiteti ka thënë më herët se është në trualli ku do ndërtohet shkolla është e Kampusit Universitar, ndërsa Veliaj është shprehur se pavarësisht opinioneve të ndryshme, duhet folur për fakte.
I besuari i socialistëve për një mandat të dytë në krye të Bashkisë së Tiranës, theksoi se një shkollë për 2.000 fëmijët e zonës “është e pakundërshtueshme”.
“Kemi shpronësuar një tokë private për shkollën, e cila do të jetë vetëm 600 metra distancë nga e gjithë zona përreth saj për komunitetin. Rektori thotë që ne duhet ta zhvendosim. Por është nonsens të zhvendosim një projekt për 100 metra. Ai ka vërtet masterplan të miratuar nga KKT, por kjo nuk është as leje zhvillimore, as leje ndërtimi. Debatet i pranoj, sepse kur kalova sheshin Skënderbej apo Pazarin e ri, kjo është diçka shumë e vogël. Sipas procedurave të Bashkisë së Tiranës, ne kemi gjetur pronën private të një shtetasi, buzë rrugës. Kemi hetuar si e kanë marrë këta tokën me kthimin dhe kompensimin e pronave në vitin 2006, nën drejtimin e demokratëve të Sali Berishës. Meqë këta ia kanë kaluar pronarit tokën, ne kemi dëmshpërblyer pronarët sepse atë tokë e shohim të arsyeshme për ndërtimin e shkollës.
Rektori që ka bërë vet masterplanin thotë të jetë 100 m më poshtë. Por kjo është si lojë kungulleshkash, pse jo 99 m. Ky nuk është debat për t’u bërë me rektorin. Ky qytet duhet të ketë një shkollë ‘Nënë Tereza’ dhe ne gjetëm tokën e një familjeje private që është jashtë rrethimit të UBT-së. Habia ime më e madhe është kur shoh dhëndrin e kryeministrit që del, ndërsa vjehrri i tij i ka kthyer tokën pronarit. Ne nisëm hetimet kur pamë që ky pronari e ka marrë tokën nga Berisha dhe PD-ja, që ia ka kthyer tokën dhe i ka dhënë certifikatën. Kështu që ne, me VKB dëmshpërblyem pronarin në një marrëveshje të ligjshme.
Këtu kemi një komunitet që quhet Kodër Kamëz dhe një nxënës që të vijë nga Kodër Kamza për në gjimnaz duhet të vijë në Laprakë te ‘Aleks Buda’, edhe ata të 8-vjeçares duhet të bëjnë 2-3 km për të shkuar në shkollë. Shkolla do jetë më vete, e ndarë nga UBT, sepse kemi një tokë private që do jetë e rrethuar. Ne kemi nevojë që të sistemojmë 2.000 fëmijë për në shkollë dhe me këtë rast reduktojmë edhe trafikun që çon nxënësit në shkolla, aty janë vetëm 600 m larg”, tha Veliaj./ Opinion.al E.Xh.
