Komisioni Qendror i Zgjedhjeve mblidhet paraditen e sotme për të vendosur mbi mandatin e deputetit të PS-së, Armando Prenga. Ai është një prej deputetëve të hetuar pasi dyshohet se ka fshehur të shkuarën kriminale.
Përmes një dokumenti të siguruar nga Opinion.al shihet se Prenga nuk ka deklaruar dënimin e formës së prerë të marrë në Gjykatën e Shkallës së Parë Kurbin. Për pasojë Prokuroria e Përgjithshme i ka kërkuar KQZ-së ti heqë mandatin deputetit të Laçit.
Sakaq, Prokuroria ka nisur hetim edhe ndaj KQZ-së pasi dyshohet se ka shkelur ligjin duke pranuar deklarime jashtë afateve si dhe për mosbashkëpunim.
Përmes një deklarate për mediat, ditën e diel, KQZ tha se “deputetët Armando Prenga, Asllan Dogjani, Andrea Marto, Florion Mima dhe kryebashkiakët Artur Bardhi, Adem Lala, Ndrec Dedaj dhe Zef Hila nuk kanë shënuar asgjë në rubrikat e formularit të vetëdeklarimit, por, sipas vërtetimit të gjendjes gjyqësore, rezulton se kanë dënime me vendim të formës së prerë, fillim të procedimit penal apo shqyrtime nga gjykatat shqiptare për vepra penale të cilat nuk përfshihen në kushtet për ndalimin e ushtrimit të profesionit”.
Mes dy institucioneve tensioni po rritet dhe pritet që mbledhja e sotme e KQZ-së të jetë shumë më e ndryshme nga mbledhja kur u hoqën menjëherë mandatet e deputetëve Dashamir Tahiri, Shkëlqim Selami dhe kryebashkiakut Elvis Rroshi. /Opinion.al
