Një operacion i vështirë policor është zhvilluar mbrëmjen e djeshme në lagjen “Don Bosko” në Tiranë. Gjatë aksionit policia ka qëlluar me armë për të ndaluar trafikantin drogës. Operacioni ka zgjatur për mbi 2 orë duke alarmuar edhe banorët që kanë parë forca të shumta policie dhe kanë dëgjuar të shtënat e armëve.
Sot, policia ka zbardhur gjithë operacionin që çoi në arrestimin e 3 personave: Blendi Peca, Ardit dhe Shehat Murati (babë e bir). Në kërkim është djali tjetër i familjes, Arbër Murati. Janë sekuestruar afro gjysmë kilogram kokaine, valutë, etj.
Operacioni policor në Don Bosko
Drejtoria Vendore e Policisë Tiranë në rrugë operative, dispononte informacion se shtetasit Blendi Peca, Arbër Murati dhe Ardit Murati, qarkullonin në qytet të armatosur dhe ushtronin aktivitetin e kundraligjshëm të shitjes në sasi të konsiderueshme të lëndës narkotike të llojit kokainë në zonën e Don Boskos.
Drejtoria Vendore e Policisë Tiranë ka organizuar operacionin “Përpjekje e dështuar” për kapjen në flagrancë të këtyre shtetasve mbrëmjen e djeshme (1 gusht).
Blendi Peca është konstatuar nga shërbimet e policisë duke lëvizur me mjetin tip “Citroen”, në zonën e Don Boskos”. Shërbimet e policisë janë vënë në ndjekje të tij për të bërë ndalimin e mjetit. I është bërë shenja e ndalimit nga punonjësit e policisë të veshur me jelekun multifunksional me mbishkrimin “Policia”, por mjeti nuk ka ndaluar, ka kryer manovra lëvizjeje të rrezikshme për jetën e punonjësve të policisë. Në këto kushte punonjësit e policisë kanë nxjerrë armën e brezit dhe kanë qëlluar në ajër duke dhënë përsëri urdhër ndalimi, por drejtuesi i mjetit nuk është bindur, ka vijuar tentativën për tu larguar. Punonjësit e policisë kanë shenjestruar dhe qëlluar gomat e mjetit dhe kur janë afruar kanë vënë re se është plagosur lehtë, drejtuesi i mjetit, shtetasi Blendi Peca, 27 vjeç, i cili u dërgua në spital dhe është jashtë rrezikut për jetën.
Gjatë kontrollit fizik të ushtruar në automjet, është gjetur një sasi lënde narkotike e dyshuar e llojit kokainë e cila rezultoi e peshës 385 gramë. Duke qenë në kushtet e flagrancës është ushtruar kontroll në banesën e shtetasit Arbër Murati, ku në dhomën e gjumit është gjetur një sasi lënde narkotike e dyshuar e llojit kokainë e peshës 50.2 gramë, 10 doza pluhuri të dyshuara të llojit kokainë, ngjyrë e bardhë, një dorezë metalike, një sasi vlere monetare në valutë prej 1 210 euro dhe 18 000 lekë të reja, të cilat u sekuestruan. Për pasojë u arrestuan në kushtet e flagrancës shtetasit :
– Blendi Peca, 27 vjeç, banues në Tiranë.
– Ardit Murati, 24 vjeç, dhe Shehat Murati, 50 vjeç, banues në Tiranë ( at dhe bir).
U shpall në kërkim shtetasi :
– Arbër Murati, 22 vjeç, banues në Tiranë, i biri i Shehatit.
U sekuestruan në cilësinë e provës materiale :
– 435.2 gramë kokainë.
– 1210 euro dhe 18 000 lekë të reja.
– mjeti tip ” Citroen”.
– peshore elektronike.
– dorezë metalike.
Veprimet procduriale u monitoruan nga SHÇBA dhe Prokurori i gatshëm.
U referuan materialet në Prokurorinë e Rrethit Gjyqësorë Tiranë në ngarkim të shtetasve B.P., A.M., dhe Sh.M.,për veprat penale ” Kundërshtimi i punonjësit të policisë”, “Mosbindje e urdhërit të punonjësit të policisë”, “Përdorim dhe mbajtja pa leje e armëve të ftohta” parashikuar nga nenet 283/2, 242, 236 dhe 279 të Kodit penal, ndërsa për shtetasin A.M., për veprën penale “Prodhim dhe shitje narkotikëve e kryer në bashkëpunim”, neni 283/2 i Kodit Penal.
