Ka shkuar në 4 numri i arrestuarve nga policia lidhur me ngjarjen e datës 5 Shkurt 2020 ku si pasojë e përplasjes me armë në qendër të qytetit të Shkodrës mbeti e plagosur një 35-vjeçare. Në pranga të bluve ka rënë 27-vjeçari me iniciale L.L banues në lagjen Tepe të Shkodrës.
Sipas njoftimit të bluve arrestimi i tij u bë pasi gjatë veprimeve hetimore ka rezultuar qe më ndërmjetësinë e tij, personat e arrestuar kanë shkuar në Shkodër, ku dhe kanë shkëmbyer zjarr me armë, me Mersad Metën, i cili është ende në kërkim.
Gjatë ditës së djeshme policia bëri të ditur arrestimin e tre personave Arxhend Rexha, 31 vjeç, banues në Durrës, Ension Buraku, 28 vjeç, banues në Durrës dhe Riad Xheladini, 22 vjeç, banues në Shkup, Maqedoni.
Ndërkohë, autoritetet kanë shpallur në kërkim dhe një 26-vjeçar, të identifikuar si Mersad Meta, banues në fshatin Berdicë të Shkodrës.
Bëhet me dije se në këtë ngjarje janë përfshirë dy grupe të rinj të cilët janë përplasur me armë zjarri në qendër të qytetit rreth orës 22:40 të së mërkurës.
Mësohet se njëri nga grupet e të rinjve kanë qenë të ulur tek stolat e pedonales ‘Kolë Idremeno’, dhe më pas pranë tyre ka ardhur grupi tjetër i të rinjve nga rruga ‘Françeskane’. Sapo të rinjtë kanë parë njëri-tjetrin kanë nxjerrë armët dhe kanë qëlluar duke e kthyer pedonalen në një ‘arenë lufte’.
Por nga breshëria e plumbave që të rinjtë kanë qëlluar nuk është plagosur asnjëri prej tyre. Njëri nga plumbat ka kapur një 35-vjeçare e cila po kalonte rastësisht aty së bashku me motrën dhe dy kunetërit e saj./Opinion.al/
