Që prej mbrëmjes së djeshme policia është në ndjekje të katër personave të shpallur në kërkim për përplasjen me armë në Kombinat, ku mbetën të plagosur dy të rinj.
Xhenis Vrapi dhe shoku i tij Jurgen Shakri u qëlluan me pistoletë teksa udhëtonin me një makinë tip Audi në në rrugën “Sabaudin Gabrani”. Autorët, të cilët janë identifikuar nga policia ishin në një automjet “Volkswagen Golf”.
Në vendngjarje policia sekuestroi 8 gëzhoja, 4 automjete dhe 2 telefona celularë. Vrapi dhe miku i tij Shakri, morën plagë të lehta në trup dhe u dërguan në spital. Gjatë marrjes së tyre në pyetje dy të plagosurit dhanë deklarime të pavërteta mbi rrethanat e ngjarjes, ç’ka bëri që policia t’i arrestojë për dëshmi të rreme, raporton Tv Klan.
Policia e Tiranës kreu një sërë kontrollesh për gjetjen dhe kapjen e të dyshuarve dhe ngriti pika kontrolli e postblloqe në disa kryqëzime të Tiranës. Hetuesit dyshojnë se sherri mes të rinjve ka qenë për çështje borxhesh.
